Maski profisional saude sira uza ekipamentu protesaun oin-oin, sira hasoru risku liu, no banhira sira sai infektadu, dala darak sira dezenvolve sintoma grave. Tanba saa ida nee akontese?

Tuir especialista sira, razaun ba ida nee mak tanba profisional saude sira expoe sira nia aan ba kuantidade boot virus nian. Bainhira virus aumenta barak liu iha ema nia isin, moras mos sai grave liu, no iha kapasidade boot liu tan hodi hadaet ba ema seluk. Esplikasaun ida nee mai hosi profesora Wendy Barclay, hosi Departamento de Doenças Infecciosas do Imperial College de Londres. Tanba profisional saude sira sempre kontatu ho ema nebee moras grave ona, entaun sira hasoru risku boot liu. Tuir OMS (WHO) nia estudu, ema ida bele hadaet moras Covid-19 ba ema nain 3 tan, maibee iha sidadi Wuhan, iha China, pasienti ida iha hospital hadaet coronavirus foun ba profisional saude nain 14 tan, molok nia senti isin manas. Tuir profesora Barclay, maski ema ida bele iha isin diak, ninia sistema imunológiko sei susaar tebes atu luta hasoru vírus bainhira vírus sai barak liu ona iha ninia isin.

Iha Itália, too iha inísiu fulan abril, profisional saude nain 6,200 sai infektadu, hosi total ema nain rihun 100 resin nebee hetan positivu ba Covid-19. Iha Espanha, hosi total ema sira nebee hetan moras Covid-19, 12% mak profisional saude sira, tuir levantamentu too iha inisiu fulan Abril. Iha Reinu Unidu, tuir autoridade lokal ida, iha hospital iha área balun nebee ekipa profisional saude liu 50% hetan infektadu. Se la iha kuidadu didiak, ita nia mediku no enfermeiru sira bele hasoru susar boot. No ita tenki kontrole didiak atu hospital sira labele sai fatin nebee sei espalha moras Covid-19 ba nasaun.

Ho informasaun hosi BBC News Brasil