Investigador sira estuda kazu ida nebee akontese iha sidadi Guangzhou, iha restauranti ida, iha nebee ema ida nebee infetadu ona ho coronavírus maibee asintomátiku (katak la hatudu sintoma), hadaet vírus ba ema nain 9 tan.
Hosi ema nain 90 nebee iha restautante laran, sira nebee hetan infetadu mak sira nebee tuur iha diresaun AC nia anin. Tuir dezenhu iha leten, nebee investigador sira rasik halo, ita haree katak ema nebee infetadu (A1) tuur mais ou menos iha klaran, iha meza A, no sira nebee hetan infetadu iha nebaa mak sira nebee tuur iha mesa B no C. Maski sira balun tuur dook liu metru ida ka rua, sira hetan infetadu. Maibe meza tolu hotu nee iha diresaun AC nia anin. Tuir investigador sira, bainhira ema nebee iha vírus ona, nia koalia, nia hasai husi ibun gotíkulas bee nian nebee lori vírus. Bainhira gotíkulas nee boot uituan, sira todan no monu ba rai la kleur no la dook liu metru ida hosi ema moras. Maibee, bainhira gotíkulas bee nian nee kiik, sira hela tempu barak iha ar. No anin AC nian bele ajuda gotíkulas sira semu dook baa-mai, hodi espalha vírus ba ema sira nebee tuur iha diresaun AC nia anin.
Iha restauranti nee, sira nain 81 nebee la hetan infetadu, mak sira nebee tuur dook liu no sees hosi AC nia anin.
Nee duni, restauranti nain sira no kantor sira tenki hanoin didiak oinsá mak sira sei instala AC ka sistema ventilasaun nian iha sira nia fatin.
Estudu nee sei publika iha periódico Emerging Infectious Diseases, nebee hola parte ba Center for Disease Control of the EUA).
Ho informasaun hosi Observador.pt