Hamrik no ba iha cidade Sarepta, iha rai Sidon no hela iha neba. Agora, hau haruka ona feto faluk ida iha nebaa atu fo hahan ba o (1 Liurai 17:9)
Bainhira rai hamlaha ataka Israel, Maromak koalia ba profeta Elias “ Ba iha Sarepta hau haruka ona feto faluk ida iha nebaa atu fo hahan ba o”. Mai ita hare buat rua importante husi istoria ida nee.
Primeiro, Bainhira nia nia nesesidade mosu mai iha ita nia fatin, ida nee maka Maromak Nia maneira hodi servisu. Tan nune husu ba Nia hodi fo hatene ba ita fatin nebe ita tenke ba no saida maka ita sei halo iha neba. No bainhira Nia halo ida nee mai ita, ita mos tenke book aan hodi halo saida maka Nia haruka!
Segundu, Ema nebe Maromak uja hodi ajuda ita ida nee sai supreza ida ba ita. Dalaruma ema nee ita la fo importansia ba nia durante nee. Feto faluk nebe laiha sala nee, nia so iha deit terigu no mina oitoan deit (1 Liurai :17 12) mesmu oitoan maibe ida nee laos problema ba Maromak. Maromak la presica sasan ou buat barak hodi halo buat boot maibe Maromak presica deit fuan nebe prontu hodi simu Maromak Nia planu. Tamba saida Maromak la haruka Elia ba familia ou ema nebe riku? Tamba familia riku la presica milagre, Maromak halo ida nee ba familia kiak para hodi Nia halo milagre. Bainhira Maromak iha servisu para Nia atu halo, Nai Maromak buka ema ho fuan nebe kee diak, ema nebe kee fiar nebee metin nebe prontu fo ba Maromak para Nia servisu bele iha bensaun. Ikus mai “ Tempu At” sira mai Maromak no los hodi ajuda ita. Milagre mosu bainhira ita hasoru depresaun ekonomia. Ita hare hanesan tempu ida nebee aat tebes ba ita maibe Maromak komesa book aan hodi servisu atu ajuda ita. Feto faluk ida nee nia so iha deit terigu restu oitoan depois han para hein deit mate mai. Tan nune feto faluk nee nia ba halo tuir saida maka Elias husu tan nunee feto faluk nee nia ho ninia familia sira han loron ba loron tamba milagre nebe Maromak halo. Terigu nee la hotu no sira nia mina mos la maran (1 Liurai 17:15). Savi husi milagre maka feto faluk nee rona no obedese profeta Elias nia liafuan katak “Keta tauk maibe o ba halo primeiro ba hau dose kiikoan ida mai hau” (1 Liurai 17:13). Liafuan savi ba loron ohin maka: KETA TAUK, TAU MAROMAK IHA PARTE PRIMEIRO no Nai Maromak sei fo buat nebe ita presica. (RG)
Hahan ba klamar: Deuteronio 14 – 17, Lucas 11:45 – 54, Salmu 119:9 – 16, Probervius 17:4 – 6