Tanba ema loos bele monu dala hitu, no nia sei hamriik fali,…………….. Proverbiu (24:6)
Ita ultrapasa ‘sentimentu ‘tauk falha’ ne’e mak ita sei ba oin ho ideia ida dehan foti risku. Buat importante ne’ebe ita presija hanoin mak, bainhira ita falha, labele rende. Istoria barak hatudu katak, falha ne’e hanesan ponte ida ba susesu. Iha eskola, Napoleon hetan 42 lugar husi estudante 43, mezmu nune’e nia harii militar ne’ebe manan rai barak husi mundu. George Washington lakon 2/3 husi batalha militar, mezmu hasoru dezafiu ne’ebe mak boot, nia konsege manan funu revolusionariu no muda Istoria Amerika. Albert Einstein ne’e ema ida ne’ebe aprende neneik tebes, tamba ne’e iha sujestaun atu muda husi fizika ba disiplina seluk, maibe ohin loron ita konsidera nia hanesan aman ba bomba atomik.
Bainhira ita bolu ema sira ne’e nia naran, ita la hanoin hetan sira nia falha, maibe ita hanoin hetan sira nia kontribuisaun ba mundu ida ne’e. Bainhira ita konsidera ita nia falha ne’e mak ikus ona ba ita, entaun ita sai duni ema ne’ebe falha. Falha ne’e laos eventu, falha ne’e hanesan opiniaun deit, no bainhira ida ne’e laos ita nia opiniaun, ita bele hamriik fali no bele sai susesu. Tanba ema loos bele monu dala hitu, no nia sei hamriik fali.’ Franklin Roosevelt iha ninia kargu primeiru hanesan prezidente, nia koalia ba nasaun, ‘Buat ne’ebe ita tenke tauk ne’e mak tauk ne’e rasik.’ Falha ne’e laos aat tebes; maibe ita bele komesa fali. Maibe tauk falha ne’e bele kauza buat ne’ebe aat tebes ba ita nia objetivo liuliu hapara ita atu koko tan.
Hafoin alista senariu sira ne’ebe bele akontese mai ita, hanesan terus, susar, persegisaun, hamlaha, ropa laiha, ameasa, kroat, Paulo hakere: Maski ita hetan susar oinsaa mos, ita manaan ona, ita manaan liu dook tanba Kristu hadomi teb-tebes ita. (Roma 8:37) Entaun, liafuan ba ita ohin loron mak – Labele tauk failha. (AFS)
Aihan ba Klamar: >Jonas 2 >Lukas 11:29-32