“Nai, Ita Boot kumpri ona Ita Boot nia promesa mai hau ata. Agora Ita Boot bele husik ona hau mate ho pas. (Lucas 2:29)
Biblia hatete: Tempu nee, iha katuas ida naran Simeão hela iha sidade Jerusalém. Nia ema ida nebee moris loos i hamtauk Maromak. Nia hein hela Maromak atu salva ema Israel. Espiritu Santu domina nia, i foo hatene ona ba nia katak, nia sei haree tiha Kristu, Ida nebee Nai Maromak promete hori uluk ona, nee mak foin nia mate. Iha loron nee, Maromak nia Espiritu foo hanoin ba Simeão para baa iha area uma kreda boot nian. Nunee, bainhira José ho Maria lori Jesus baa entrega ba Maromak hodi kumpri lei, Simeão mos iha nebaa. Nia kous Kosok Oan nee hodi hahii Maromak dehan, “Nai, Ita Boot kumpri ona Ita Boot nia promesa mai hau ata. Agora Ita Boot bele husik ona hau mate ho pas. Tanba hau nia matan haree ona Ema nebee mak Ita Boot haruka mai atu salva ami. Ita Boot prepara ona Nia para nasaun hotu-hotu bele haree. Nia sai naroman ba nasaun sira seluk, i halo Ita Boot nia povu Israel sai naran boot.” Rona nunee, Jesus nia inan-aman admira ho buat nebee Simeão hatete kona ba sira nia Oan. Depois Simeão foo bensaun ba sira, i hatete ba Jesus nia inan Maria, “Maromak desidi ona katak, ema Israel barak sei monu tanba la simu Labarik nee, maibee sira seluk Nia sei foti sae. Nia sei hatudu sai Maromak nia planu, maibee ema barak sei koalia kontra Nia. (Lucas 2:25-34) Istoria Simeão hanorin ita buat loos tolu ne’ebe importante: Primeiru: Mezmu kleur tebes, maibe se ita buka Nai Maromak ita sei hetan Nia. Ou ida di’ak liu ne’e Nia mak hetan ita no hatudu Nia an ba ita. Segundu: Maromak laos hanesan ita ema ne’ebe hili tempu no buka maneira atu hasoru ho ita. Simeão la asiste Kristu ninia ministeiru ekstraordinariu durante tinan tolu ho balu ne’ebe nakonu ho poder supranatural. Nia haree deit mak bebe ida ne’ebe foin moris no kous hela iha Maria nia liman laran. Maibe nia haree Maromak, ida ne’e natoon ona ba nia. Terseiru: Simeão ema ida nebee moris loos i hamtauk Maromak, nia hatene katak nia prontu ona atu mate, antes nia hasoru Nai no hakuak Nia. Ita barak mak lakohi mate tamba deit ita seidauk haree mundu. Simeão lakohi mate tamba nia hakarak haree uluk salvador mundu ne’e nian. Entaun, pergunta ne’ebe ita tenke husu mak, ita haree ona Nai? Nia ne’e ita nia salvador pesoal? Se ita iha resposta ne’ebe loos ba pergunta rua ne’e signifika ita mos pontu mate bainhira mate mai hasoru ita. (AFS)
Aihan ba Klamar: >Isaias 9:1-7 >Mateus 1:18-25 > Mikeias 5:2-5a > Isaias 7:14