‘Labele laran ida ho ema nebe la fiar ba kristu. Hanoin took. Ema nebe moris los bele par ho ema nebe moris aat ka? Naroman ho nakukun bele hamutuk ka? Lae!’ (2 Korintus 6:14)
Bibi malae ho kuda Kamelu, ida-idak ho nia ikun, matan rua, no ain haat. Maibe se bainhira ita tau sira nain rua para hamutuk iha fatin ida, sira sei la halo belun ou halo servisu hamutuk ho diak. Sira sei halo buat nebe diferente no sei lao iha diresaun nebe lahanesan. Tamba Maromak Kria sira ho karakter nebe lahanesan! Liu husi exemplu ida nee bele fo hanoin ba o katak, tan nee o tenke iha matenek hodi hili parseiru, ho se mak o bele halao relasionamentu. Mosu depois lakon, tan nee hili ba ema nebe iha atributu, Exemplu:
- Tau matan didiak oinsa nia trata ema no nia maneira hodi kuidadu ema, hanesan faan nain sira.
- Interese nebe nia iha?
- Fahe nia talento no buras spiritual?
- Nia iha interese ba saida mak o koalia?
- Oinsa nia trata ema sira nebe nia la gosta?
Bainhira foin konese malu, tenke iha buat ruma nebe atria, atu nune loron ikus labele fahe malu. No tenek o mak hili, laos nia mak hili o. hanoin didiak ba saida mak o hakarak tebes, no labele tau konfiansa hodi fo o nia fuan ba ema nebe o sedauk hatene nia ho didiak, primeiru, o tenke buka hatene ema nee. Maneira hodi buka hatene ema ne se maka liu husi, husu ba Maromak atu fo matenek ba o hodi o bele lee ema nia karakter liu husi nia lalaok. Bainhira o atu foti desijaun ruma hodi halao relasionamentu ho ema ida nee , o presija loke o nia matan no hare didiak ema ne.
Stop. Rona. Rona. Orasaun. Ida nee mak hanorin Biblia nian nebe o presija kaer metin atu o iha matenek hodi foti desijaun konaba ho se maka o bele hili sai o nia parseiru ba o nia moris tomak.(HG)
Hahan ba Klamar:*Ex 36-38, *Mat 8:1-9, *Sal 81, *Pro 2:11-15