Professores eskola anti-golpe uza farda ho sapeo tradisional Myanmar partisipa iha manifestasaun iha Mandalay, Myanmar , 3 Marsu 2021. (Foto: AP)
Professores eskola liu rihun 125 iha Myanmar hetan suspensaun husi autoridade military tamba tuir movimentu sivil hodi kontra golpe military iha fulan Fevereiru, dehan funsionariu Federasaun Professores Myanmar.
Desijaun ne’e halo loron hirak antes hahu ano letivo foun. Professores balun no inan aman servisu hamutuk kontra. Aksaun ne’e sai hanesan parte ida husi kampanha nebe paralizadu nasaun neba desde golpe termina reformasaun demokrasia nebe lao durante tinan 10.
Iha Sábadu (22/5), kuaze professors 125.900 mak hetan suspensaun, dehan funsionariu federasaun professores nebe lakohi fo sai nia naran. Nia inklui iha lista naran nebe buka husi junta tamba hetan akuzasaun katak provoka hodi hamosu odio.
Myanmar iha professors eskola rihun 430, tuir dadus iha tinan rua liu ba.
Reuters seidauk konsege kontaktu ho porta-voz junta militar ou Ministeriu Edukasaun hodi husu klarifikasaun. (MF)