Prezidenti Institutu Jestaun Ekipamentus Públiku IP. Eng. Ermenegilda da Costa Laurentina MsC. (Foto: Andre Gusmão)
Prezidenti Institutu Jestaun Ekipamentus Públiku IP. Eng. Ermenegilda da Costa Laurentina MsC. iha nia servisu fatin edifisiu Institutu Jestaun Ekipamentus IP. kuarta semana ne’e ba Radio Voz hateten,
Estrada foun ho distansia kilometru 5 nebe liga centru suco Biqueli ba aldeia Uaro-Ana-Akrema iha postu administrativu Atauro ateru hotu ona no posibiliza kareta no motor bele asesu hosi centru postu administrativu Atauro to’o iha aldeia Uaro-Ana-Akrema.
Ho nune’e, prezidenti IGE Ermenegilda garante estrada foun ne’e bele fasilita viazen komitiva Primeiru Ministru Jeneral Taur Matan Ruak atu ba halo inagurasaun postu polisia marítima iha Uaro-Ana-Akrema suco Biqueli iha tempu badak.
Prezidenti IGE Ermenegilda haktuir, estrada foun nebe liga sentru suco Biqueli ba aldeia Uaru-Ana Akrema ne’e tama kategoria prioridade tamba aldeia Uaro-Ana-Akrema konsideradu nudar fatin estratéziku ba aspketu seguransa teritorial marítimas no terestre nasaun nian. Tanba pozisaun aldeia Uaro-Ana-Akrema jeográfikamente ho frontera tasi besik malu ho illa Liran teritória Indonesia.
Prezidenti IGE konfesa nia senti konfortavel ho maturidade povu Atauro tanba laiha problema nebe IGE infrenta liu-liu liga ba rai nebe estrada alarga tama ba. Prezidente IGE mos elozia maturidade no komportamentu diak povu aldeia Uaro-Ana-Akrema no povu Atauro em jeral nebe hatudu umanizmu sosial bo’ot no kolaborsaun diak tebes bele servisu hamutuk ho ekipe téniku IGE nebe aplika servisu iha terrenu. (AG)