Primeiru Ministru Republika Demokratika Timor Leste Jeneral Taur Matan Ruak. (Foto: fontes google).
Primeiru Ministru Republika Demokratika Timor Leste Jeneral Taur Matan Ruak, iha Palasiu Prezidenti Nicolau Lobato kinta semana ne’e informa ba Prezidenti da Republika DR. Francisco Guterres Lu-Olo katak, governu halo ona preparativus ba eleisaun prezidensial nebe sei akontese iha tinan 2022. Primeiru Ministru hafoin nia enkontru semanal ho prezidenti Lu-Olo ba jornalista sira esplika, eleisaun prezidensial tinan 2022 sei infrenta dezafius bo’ot tanba intensitas pandemia Covid-19 iha nasaun kontinua sa’e nafatin atinji ona númeru pozitivu liu rihun 6, ho numeru mate nain 14, tanba ne’e governu tenki halo preparasaun diak hodi infrenta hasoru.
Meios nebe bele ajuda redús numeru moras covid-19 iha nasaun maka povu Timor oan hotu tenke disiplina halo tuir regras protokolu saude Covid-19 no tenke involve hotu simu vasina. Hodi nune’e bele redús numeru grave, redús numeru mate, liu-liu iha periodu implementasau eleisaun prezidensial.
Primeiru ministru alerta, Timor Leste sei la sés hosi situasaun kalamidade global pandemia Covid-19 nebe akontese ba nasaun barak iha mundu hanesan America nebe mate ona ema rihun 500.000 resin, Brasil nebe mos mate ema rihun atus 500.000 resin, India asumi númeru númeru da’et bo’ot ho nuemeru mate barak, hanesan mos Brasil ho numeru afetadu barak ho nivel ema mate ás.
Timor Leste, proporsionalmente ema hakfodak tanba númeru da’et covid-19 sa’e maibe mate nain 14, ke tuir lolós Timor Leste nia numeru mate atus 100 resin ona.
Konkluzaun nebe deskobre katak, Timor Leste nia numeru mate kikoan tanba eskalasaun transmisaun covid-19 barak liu kategoria asintomátiku ho sekmentasaun alastramentu barak liu kona sidadaun idade jovens sira no seidauk kona ba ema idade avansadus ho kondisaun moras komplikadu barak nebe posivelmente bele rezulta numeru mate sa’e makaas.
Tamba ne’e Primeiru Ministru husu ba povu Timor Oan tomak atu kolabora hodi redús intensitas eskalasaun da’et virus corona iha sosiedade nasaun, tanba se lae, ema balun sei mate uluk no balun sei mate tuir. (AG)