“No Samuel foti buli mina nian no fakar ba iha Saul nia ulun.” ~ 1 Samuel 10:1 NKJV

Ida ne’e mak istória importante teb-tebes kona-ba oinsá Saul sai liurai primeiru ba povu Izraél sira. Nia sai ba iha sidade liur hodi buka ninia aman nia kuda buru sira ne’ebé mak lakon bainhira nia hasoru profeta Samuel. ‘Samuel dehan ba Saul: “Dehan ba atan ida ne’e atu ba uluk molok ita.” No nia kontinua. “Maibé ó hein iha ne’e ba tempu balu, ha’u sei dehan ba ó Maromak nia Liafuan.” No Samuel foti… mina no fakar ba iha Saul nia ulun, no… dehan: “La’os Maromak kose mina ona ba ó hodi komanda Ninia povu?”’ (1 Samuel 9:27 – 10:1 NKJV)

Hanoin kona-ba ida ne’e: Saul sai ba liur hodi buka kuda buru – no deskobre nia destinu! No ida ne’e mós bele akontese ba ó! Maromak iha hábitu hodi bolu ema sira ne’ebé mak okupadu hela halo buat seluk. Tiago no João sibuk hadi’a hela sira-nia kail ikan, Mateus kobra hela impostu, Elisa kuda to’os hela, no Saul sai hela hodi buka ninia aman nia kuda buru sira ne’ebé mak lakon. Ne’e só loron seluk iha servisu, servisu hodi buka moris. Maibé bainhira Maromak iha destinu ba ó, no data iha Ninia kalendáriu ho ó-nia naran iha ne’ebá, Nia sei mai no foti ó.

Ó bele dehan, ‘Maibé ha’u la’os ema ne’ebé mak espesial!’ No ida ne’e mos mak Saul hateten: “La’os ha’u mai husi suku Benjamin, suku ne’ebé mak ki’ik-oan liu iha Izraél, no ha’u-nia família mak ida ne’ebé ki’ik liu entre família sira hotu husi suku Benjamin?’ (1 Samuel 9:21 NKJV). Ó-nia status sosiál sei labele atu limita Maromak. Bainhira Nia iha planu ba ó, Nia sei atinje to’o iha ó-nia background (latar belakang) no lori ó sai mai iha futuru.

Entaun, mantein fiél nafatin, kontinua hodi serbi Nia no ó-nia tempu sei mai! (SML)

 

Hahán Espiritual: Apokalipse 1-4 ; Markus 13:12-23 ; Salmu 117 ; Proverbiu 12:20-22