‘No sira insulta nia.’ ~ 1 Samuel 10:27 NKJV
Bainhira Na’i Maromak bolu ó ba iha destinu ne’ebé mak espesial, la’os ema hotu-hotu mak sei kontente kona-ba ida ne’e. Depoizde Saul sai liurai ne’ebé mak Maromak hili, ema balun dehan, ‘“Oinsá mak ema ida ne’e bele salva ita?” Nune’e, sira insulta nia no la lori prezente furak ruma ba nia. Maibé Saul mantein nafatin ninia paz.’
Atensaun ba iha Saul ninia reasaun ba krítika sira ne’ebé mak nia simu: ‘Nia mantein nafatin ninia paz.’ Pontu importante iha ne’e mak: ida ne’e la’os ó-nia responsabilidade atu konvense ema seluk kona-ba Maromak nia bolu iha ó, maibé, ida ne’e sira-nia responsabilidade atu haree ba ida ne’e. Bíblia hateten, ‘Ema ida nia prezenti prepara fatin ba nia an.’ (Proverbiu 18:16 NASB) Ó-nia prezenti sira – no sira-nia rezultadu sira ne’ebé mak sira produz – mak halo válidu Na’i Maromak nia bolu iha ó. ‘Samuel dehan ba Saul… “hein iha ne’e ba tempu balu, no ha’u sei dehan sai ba ó Maromak nia Liafuan.”’ (1 Samuel 9:27 NKJV) Bainhira ó hatene katak ó rona tiha ona husi Na’i Maromak, ema seluk ninia krítika sei ladún afeta ba ó. Na’i Maromak nia prezensa halo ó fiar metin, Ninia liafuan dirije ó-nia dalan no Ninia paz hakalma ó-nia laran. Depoizde ó rona ona Na’i Maromak nia Liafuan kona-ba ó, ema seluk ninia liafuan ne’ebe mak hatún ó sei la halo ó hirus, tamba ó-nia ain rua sama metin iha rai nia leten no ó-nia instrusaun ne’e klaru. Ó sei la husu ema sira seluk ninia hahii ba ó, tamba Na’i Maromak ninia fiar ne’ebé mak iha ó sei satisfaz ó kompletamente. Depoizde ó rona ona Maromak nia Liafuan kona-ba ó, ó-nia atitude sira sei muda instantamente; ó sei la hasoru futuru ho hirus, tormentu ka ho ta’uk. Na’i Maromak ko’alia tiha ona kona-ba ó, Na’i ninia liafuan rezolve ona problema sira hotu no tempu sei fó provas katak Na’i Maromak lo’os.
No ida ne’e Eskritura importante ida atu tau iha hanoin laran: ‘Labele insulta inísiu ki’ik sira ne’e, tamba Na’i Maromak, haksolok hodi haree servisu ida komesa.’ (Zakarias 4:10 NLT) Duké kompara ó-nia an ho ema seluk no hatún ó-nia an rasik, selebra kada pasu ki’ik-oan husi fé iha dalan ba destinu ne’ebe mak Na’i Maromak prepara ona ba ó. ~ SML
Hahán Espiritual: Apokalipse 5-9 ; Markus 13:24-3