‘Ó presiza ema ida atu hanorin ó dala ida tan kona-ba prinsípiu dahuluk sira.’ ~ Ebreu 5:12 NKJV

Ba iha igreja dahuluk sira, Paulo hateten: ‘Iha buat barak ne’ebé mak ami hakarak atu hato’o… maibé ne’e la fásil atu esplika ba ó tamba ó neineik tebes atu komprende kona-ba lia-loos espirituál nian. Iha tempu ne’ebé mak tuir loloos ó atu hanorin fali ema seluk, ó rasik sei presiza ema seluk atu hanorin ó… Ó sai ema ne’ebé mak presiza susubeen no labele simu ai-han ne’ebé mak toos! Ba ema sira ne’ebé mak sempre presiza “susubeen” mak ema sira ne’ebé la maduru (la dewasa) – nia seidauk sai bo’ot. “Ai-han ne’ebé mak toos” só ba ema sira ne’ebé mak adultu ona.’ (Ebreu 5:11-14 PHPS)

Ida ne’e koñesidu ho naran ‘dezenvolvimentu espirituál ne’ebé mak kesi metin hela’, no ida ne’e bele akontese ba ita sé de’it. Sinál ida husi labarik ida ne’ebé mak saudável no bele sai bo’ot maka sira la presiza ona atu ema fó han sira liu husi beberón ka ema tenke ko’a sira-nia hahán ba pedasuk ki’ik-oan no hatama ba sira-nia ibun. Karik sira sei gosta liu xokolate duké ai-han vejetál sira, maibé espera katak  neineik sira besik ona atu komprende tamba saida mak sira presiza ai-han vejetál sira.

Karik tempu ne’ebé mak ó fó hahán ba ó-nia klamar mak só de’it iha loron domingu dadeersan iha igreja, tamba saida mak ó hakfodak bainhira ó la iha fé ba Maromak hodi responde ba ó-nia orasaun sira, forsa atu hasoru tentasaun sira, ka senti katak Maromak gia ó iha ó-nia moris? Tuir ó-nia hanoin, ó bele aguenta to’o bainhira karik ó han de’it dala ida durante semana ida nia laran? Job dehan, ‘Ha’u… buka Liafuan sira ne’ebé mak sai husi Na’i Maromak nia ibun liu fali duké ha’u buka ha’u-nia hahán ba ha’u-nia isin.’ (Job 23:12 NKJV) David dehan, ‘Ita-Bo’ot (Na’i Maromak) ninia liafuan midar tebes iha ha’u nia nanál, midar liu bani-been iha ha’u-nia ibun!’ (Salmu 119:103 NKJV) Jeremias hakerek, ‘Ita-Bo’ot nia liafuan ha’u hetan no ha’u han Ita-Bo’ot nia liafuan sira… Ita-Bo’ot nia liafuan mak… ksolok no kontente ba ha’u-nia fuan.’ (Jeremias 15:16 NKJV) Atu sai bo’ot espiritualmente, ó presiza ai-han forte husi Na’i Maromak ninia liafuan (haree iha Ebreu 5:14).   ~ SML

Hahán ba klamar: Apokalipse 15-18 ; Markus 14:12-26 ; Salmu 124 ; Proverbiu 12:26