‘Ó sei haluha ó-nia terus; ne’e sei sai hanesan be’e ne’ebé mak sulin ba do’ok.’ ~ Job 11:16 NLT
Mai ita ko’alia kona-ba dezenvolvimentu emosionál ne’ebé mak kesi-metin hela. Bainhira ó la hetan tulun ba ó-nia kanek emosional sira iha pasadu, ó sei haree ó-nia an halo ba ema seluk hanesan uluk ema sira halo ba ó no repete ó-nia pasadu iha ó-nia tempu prezenti. Loos duni, karik ó mós sei hakanek ema sira-ne’ebé mak importante iha ó-nia moris, no mós karik ó sei destrói imi-nia relasaun sira-ne’e sein hatene ninia razaun.
Ba fallansu sira ne’ebé mak akontese ba ó-nia relasionamentu, ó sei fó sala ba ó-nia parseiru ninia hábitu sira, ninia aparénsia, ninia atitude sira no oinsá buat hotu la’o. No nune’e, ó sei nafatin mantein emosionalmente paradu, prezu metin ba ó-nia fonte disfunsaun ida ne’ebé mak la bele kura no deskoñesidu. Saida mak ó hasoru agora mak ‘bagasi emosional’: arrependimentu ba sala sira iha pasadu, laran-moras tamba ema halo aat ba ó, no kanek hotu ne’ebé mak ó subar iha ó-nia hirus, sinizmu, no dada an husi ema seluk. Ó sei nunka atu hatene saida loos mak ó iha, ka saida loos mak ó presiza, to’o bainhira ó bele hasees ona ó-nia bagasi emosional sira-ne’e. Oinsá mak ó bele halo ida ne’e?
Ninia resposta ka ninia solusaun ó bele hetan de’it iha Maromak nia Liafuan no iha Na’i Maromak ninia prezensa: ‘Prepara ó-nia fuan no foti sa’e ó-nia liman ba Na’i Maromak iha ó-nia orasaun! Hasees tiha ó-nia pekadu sira no husik tiha buat aat hotu iha ó-nia kotuk. No ó-nia oin sei naroman ho naroman inosente nian. Ó sei sai forte no livre husi ta’uk. Ó sei haluha ó-nia terus; ne’e sei sai hanesan be’e ne’ebé mak sulin ba do’ok. Ó-nia moris sei naroman liu duké rai iha tempu loron. No nakukun mós sei naroman hanesan dadeersan. Iha esperansa sei fó ba ó korajen. Ó sei hetan protesaun no sei deskansa ho seguru… no ema barak sei buka ó hodi husu ajuda.’ (Job 11:13-19 NL ~ SML
Hahán ba klamar: Apokalipse 19-22 ; Markus 14:27-42 ; Salmu 129 ; Proverbiu 12:27-28