‘Hau subar tiha ona Ita-Bo’ot nia liafuan iha ha’u-nia fuan, hodi nune’e ha’u labele halo sala kontra Ita.’ ~ Salmu 119:11 NLT
Karik ó sente ta’uk tamba ó komete sala ne’ebé mak hanesan repete ba repete? Ida ne’e mak ó-nia solusaun: hamout ó-nia hanoin iha Maromak nia liafuan! Hanesan ho ó hamout esponja ida ba iha bee laran no bainhira ó hasai esponja ne’e husi bee laran, bee sei turuk sai husi esponja ne’e no esponja ne’e mós sei nakonu (todan) ho bee, hamout ó-nia hanoin iha Eskritura to’o nia sai mai nakonu ho Maromak nia liafuan. Hodi nune’e, bainhira ó hetan tentasaun ruma hodi halo sala, ó-nia resposta primeiru mak forsa ‘Espíritu no Liafuan’.
Karik ó nafatin halo saida mak baibain ó halo, ó sei hetan rezultadu ne’ebé mak hanesan nafatin. Nune’e, karik ó baruk no kole ona atu moris nafatin iha lakon nia laran, ida ne’e mak preskrisaun ne’ebé mak teste liuhusi tempu husi Maromak nia liafuan atu halo ó tomak fila fali:
‘Oinsá mak ema joven ida (ka ema katuas ida) mantein moos nafatin? Liuhusi obedese Ita-Bo’ot nia liafuan.’ (Salmu 119:9 NLT) ‘Ó moos tiha ona tamba Liafuan… ne’ebé mak Ha’u ko’alia tiha ona ba ó.’ (João 15:3 NKJV) ‘Katak Nia sei santifika no hamoos (ó) liuhusi fase ho bee husi Ninia Liafuan.’ (Éfezu 5:26 NKJV)
‘Na’i Maromak nia Liafuan ne’e moris no poderozu, no kroat liu duké surik ho ninia matan rua, hafahe to’o iha neon no espíritu… artikulasaun no medula, no halo diferensa ba hanoin no intensaun husi fuan nian.’ (Ebreu 4:12 NKJV) ‘Ita-Bo’ot nia liafuan ha’u hetan, no ha’u han Ita-Bo’ot nia liafuan, no Ita-Bo’ot nia liafuan mai hau sai hanesan ksolok mai ha’u-nia fuan; tamba ha’u bolu ho Ita nia naran.’ (Jeremias 15:16 NKJV)
Eskritura sira ne’e hotu lori ba konkluzaun ida: karik ó sériu duni hakarak la’o iha vitória, ó tenke tama ba iha Maromak nia liafuan no Maromak nia liafuan tama ba ó. Laiha dalan seluk tan. ~SML
Hahán ba klamar: 2 Reis 7-9 ; Markus 14:66-72 ; Salmu 132:1-10 ; Proverbiu 13:4-6