Vacina COVID-19 Pfizer iha centro médico komunitário iha São Paulo, Brasil, 6 de maio de 2021. (Foto: doc).
Governasaun Biden plano atu fo donasaun milhaun 500 dozes vasina Covid-19 produsan Pfizer (PFE.N) ba nasaun 100 durante tinan rua ba oin, tuir fontes tolu nebe hatene assuntu refere, hateten ba Reuters.
EUA possiblidade sei distribui milhaun 200 dozes tinan ne’e no milhaun 300 ba tinan oin, dehan sira. Nasaun sira nebe sei simu donasaun vasina refere, inklui nasaun 92 nebe ho rendimentu menus no Uniaun Afrikana.
EUA sei fo donasaun vasina ne’e liu husi mekanismu COVAX nebe distribui vasina Covid-19 ba nasaun-nasaun sira nebe rendimentu tun, ho apoio Organizasaun Mundial da Saúde (OMS) no Global Alliance for Vaccines and Immunization (GAVI).
Prezidente EUA Joe Biden sei anunsiu akordu ne’e iha Quinta (10/6) iha reuniaun KTT G-7, no grupu nasaun-nasaun nebe ho ekonomia dezenvolve makas iha Reinu Unidu, tuir fontes ida.
Akordu ne’e negosiadu ona durante semana ha’at nia laran husi kordenador Covid-19 iha Casa Branca ho ekipa forsa tarefa virus corona, dehan fontes ida. (MF)