‘Ninia fe’en hateke ba kotuk no nakfilak-an sai masin riin.’ ~ Genesis 19:26 NKJV

Molok harahun Sodom no Gomorra, Maromak nia anju sira salva Lot ho ninia família husi sidade. No sira hateten: ‘Halai ba imi-nia moris! Labele hateke ba imi-nia kotuk, no labele para iha dalan. Halai ba foho leten, ka imi sei mate.’ (Genesis 19:17 GWT) Maibé iha eskritura ne’e hateten: ‘Ninia feen hateke ba kotuk no nakfilak-an sai masin riin.’

Iha ne’e iha lisaun importante ida mai ita hotu: reziste ba tentasaun atu hakleur-an iha tahu pekadu husi pasadu nian – tantu ó-nian rasik ka ema seluk nian. Difísil atu hateke ba oin bainhira buat aat barak mak akontese ona ba ó iha pasadu. Maibé bainhira ó paradu iha pasadu, ó lakon saida mak Maromak prepara ba ó iha prezente, no falla atu haree ninia koneksaun ba ó-nia futuru. Liafuan di’ak ida mak ida ne’e seidauk tarde atu husik Maromak uza ó no dudu ó la’o ba oin iha ó-nia dalan moris nian. Maromak bele kura kanek ne’ebé ema seluk halo ba ó. Nia bele halo ó sai matenek liu tan nu’udar rezultadu husi desizaun sala sira ne’ebé mak ó halo iha pasadu.

Seidauk tarde ba ó atu sai ó-nia an ida uluk. Maromak gosta atu transforma ita-nia frakeza sira sai ita-nia forsa. Nia bele transforma sai tezouru saida mak ó bolu nu’udar lixu. Maske ó hakiduk no la’o sees husi dalan ne’ebé ó hatene Nia hakarak ó atu la’o tuir, agora mak tempu atu fila fali ba Ninia dalan. ‘” Ha’u hatene planu sira ne’ebe mak Ha’u iha ba ó,” Na’i Maromak dehan. “Ne’e mak planu sira ba di’ak no la’os ba dezastre, atu fó ba ó futuru no esperansa.”’ (Jeremias 29:11 NLT)

Nune’e, la’o ba oin – no labele hateke ba kotuk.    ~ SML

Hahán ba klamar: 2 Reis 10-12 ; Markus 15:1-20 ; Salmu 132:11-18 ; Proverbiu 13:7-8.