Primeiru Ministru RDTL, Jeneral Taur Matan Ruak.
Primeiru Ministru RDTL Jeneral Taur Matan Ruak, iha palasiu prezidenti Nicolau Lobato kinta semana ne’e ba jornalista sira hateten, nia kondena aktu oknum elementu PNTL ida nebe uza kilat estadu pistola hodi tiru mate ema nain rua hakanek todan ema nain ida iha Ainitas Lahane Ocidental. Primeiru Ministru triste tanba kazu nebe akontese involve autor krimi no vítimas sira nudar uma lisan familia ida.
Primeiru Ministru konsidera kazu ne’e nudar reflexu defisiensia barak iha PNTL. Maske nune’e primeiru ministru apela ba povu tomak atu keta jeneraliza problema sala individu sai sala instituisaun, tanba kazu tiru iha Lahane nudar sala individu okum elementus PNTL laos instituisaun PNTL nia sala.
Oras ne’e dadaun diskusaun estatutu PNTL lao hela, maibe saida maka akontese Primeiru Ministru liga liu ba persoalidade individual oinsa oknum elementus polisia nebe kaer kilat estadu hatene kontrola an oinsa maka kaer no uza kilat estadu nian.
Primeiru Ministru konfesa agradese ba opiniaun públiku maibe nia seidauk to’o iha hanoin ida ezonera komisariu PNTL Faustino da Costa hosi kargo komandante jeral PNTL. (AG)