‘Ita-Bo’ot nia domin iha ha’u-nia oin.’ ~ Salmu 26:3 NKJV

Istória ne’e ko’alia kona-ba labarik mane oan ida ne’ebé mak ema husu ba nia, ‘Ó halo ó-nia orasaun kalan-kalan?’ Nia hatan, ‘La’e, iha kalan balun ne’ebé mak ha’u la presiza buat ida!’

Karik ita hamnasa, maibé ninia kanek ne’e klaru teb-tebes. Karik tempu ne’ebé mak ó-nia la’en ka ó-nia feen ko’alia ba ó mak iha tempu ne’ebé sira iha problema ka nesesidade ida ne’ebé mak sira labele hasoru mesak, tuir ó-nia hanoin to’o bainhira mak ó-nia relasaun ne’e bele dura? Tenke iha balansu ida entre ó-nia hahii sira ba Maromak no ó-nia pedidu orasaun nian ba Maromak. Ó dehan, ‘Karik Maromak ne’e  bo’ot tebes atu kria no kontrola universu, ha’u dúvida karik Maromak senti perturbadu bainhira ema ida ne’ebé mak la importante hanesan ha’u, bainhira ha’u la fó obrigadu ba Nia.’ La’e! Bainhira Jesus kura ema leprozu na’in-sanulu no ida de’it mak fila fali ba Jesus hodi fó obrigadu ba Jesus, Jesus husu, ‘Sira na’in-sia seluk ba ne’ebé?’ (Lukas 17:17 NIV) Karik Maromak halo ba ó bazeia de’it ba Ninia lia-loos no ó-nia tendensia mak ba buat ne’ebé la loos, ó sei mout! Maibé Nia la halo hanesan ne’e. Maromak dehan, ‘Ha’u hadomi tiha ona ó… ho domin ne’ebé mak laiha rohan. Ho domin ne’ebé mak nunka atu kotu Ha’u dada ó besik mai Ha’u-nia an.’ (Jeremias 31:3 NLT)

Haree ba ida ne’e, salmista hakerek, ‘Tamba Ita-Bo’ot nia domin di’ak liu duké moris, ha’u-nia ibun sei hahii ba Ita-Bo’ot. Ha’u sei hahii Ita-Bo’ot bainhira ha’u moris.’ (Salmu 63:3-4 NKJV)

Dala ida tan nia hakerek: ‘Ha’u sei… hahii Ita-Bo’ot nia naran ba Ita-Bo’ot nia domin no Ita-Bo’ot nia lia-loos; tamba Ita-Bo’ot magnifika ona Ita-Bo’ot nia liafuan iha Ita-Bo’ot nia naran nia leten.  Iha loron ne’ebé ha’u tanis, Ita-Bo’ot hatan mai ha’u, no halo ha’u forte ho forsa ne’ebé mak iha ha’u-nia klamar.’ (Salmu 138:2-3 NKJV)

Ema balun ko’alia, ‘Na’i Maromak la sente laran todan ba pedidu sira bainhira Nia simu obrigadu!’ Entaun, foti momentu balun no hanoin Maromak nia domin ba . ~ SML

Hahán ba klamar: 2 Reis 13-15 ; Markus 15:21-32 ; Salmu 143 ; Proverbiu 13:9-10