‘Ida ne’e mak fiar ne’ebé ami iha hodi hakbesik ba Maromak.’ ~ 1 João 5:14 NIV
Dalaruma ita halo orasaun ‘somente’ halo orasaun de’it. Ita dehan, ‘Na’i Maromak, ami somente husu ba Ita-Bo’ot atu fó protesaun mai ami, ka haraik mai ami… Karik Ita-Bo’ot tulun de’it ami iha situasaun ida ne’e, ami sei agradese tebtebes ba Ita-Bo’ot.’
Ne’e hanesan mós ho ita dehan ba Na’i Maromak, ‘Na’i Maromak, ha’u lakohi atu interompe Ita-Bo’ot ho ida ne’e, maibé…’ Ne’e rona hanesan orasaun ne’ebé mak haraik-an, maibé iha realidade ne’e hatudu katak falta fé no fiar hodi hakbesik ba Na’i Maromak. No ida ne’e mós la hanorin iha Bíblia laran.
Bíblia hateten, ‘Mai ita hakbesik ba iha Na’i Maromak nia tronu bensaun nian ho fiar, nune’e ita sei simu Na’i Maromak nia laran luak no hetan grasa hodi ajuda ita iha tempu ne’ebé mak ita presiza.’ (Ebreu 4:16 NIV) ‘Se ita-nia fuan la kondena ita, ita iha fiar ba Maromak no simu husi Nia buat hotu ne’ebé mak ita husu, tamba ita halo tuir Ninia mandamentu sira no halo buat ne’ebé mak halo Nia laran kontente.’ (1 João 3:21-22 NIV) ‘Ida ne’e mak fiar ne’ebé mak ami iha hodi hakbesik ba Na’i Maromak: katak bainhira ita husu buat ruma ne’ebé mak hanesan ho Nia hakarak, Nia rona ita. No karik ita hatene katak Nia rona ita – saida de’it mak ita husu ba Nia – ita hatene katak ita hetan buat ne’ebé mak ita husu ba Nia.’ (1 João 5:14-15 NIV) ‘Agora ba Nia ne’ebé mak bele halo abundante tebtebes liu buat ne’ebé mak ita husu ka hanoin, tuir poder ne’ebé mak servisu iha ita, ba Nia glória… nafatin ba nafatin.’ (Efezu 3:20-21 NKJV) ‘Karik ó, maske ó ema aat ida, hatene atu fó buat ne’ebé mak di’ak ba ó-nia oan sira, ó-nia Aman ne’ebé mak iha Lalehan sei fó liu no di’ak liu tan husi buat ne’ebé mak ó husu ba Nia!’ (Mateus 7:11 NIV)
Nu’udar oan ne’ebé mak Na’i Maromak sosa tiha ona, ó bele hakbesik-an ba ó-nia Aman domin na’in iha Lalehan ho fiar, hatene katak buat saida de’it mak ó presiza, Nia sei haraik ba ó – no liu tan! ~ SML
Hahán ba klamar: Jeremias 1-3 ; Lukas 1:67-80 ; Salmu 144:1-8 ; Proverbiu 14:1-4