PM RDTL Jeneral Taur Matan Ruak (Foto: google)
Primeiru Ministru RDTL Jeneral Taur Matan Ruak, iha Palasiu Prezidente Nicolau Lobato Kinta semana ne’e ba jornalista sira hateten, nasaun lao ona iha periodu estadu emerjensia dala 14 duranti tinan fulan rua nia laran nebe limite sidadaun hotu nia direitu liberdade.
Tanba ne’e, opsaun diak liu atu redús númeru moras Covid-19 maka povu tomak envolve simu vasina, Primeiru Ministru agredese ba jornalista no média komunikasaun tomak nebe fo ona kontribuisaun bo’ot iha kampanha vasinasaun kontra virus corona Covid-19.
Primeiru Ministru deklara nia sentimentu kontenti tanba lider bo’ot rejistensia libertasaun Pátria ba ukun rasik an Xanana Gusmão nebe involve simu vasina. Primeiru Ministru hateten, lider rejistensia Xanana Gusmão hatudu ezemplu diak ba povu tomak atu banati tuir hodi partisipa simu vasina.
Xanana Gusmão hafoin simu vasiona Sinovac iha clínica Fatumeta loron ne’e, deklara nia apelu ba populasaun tomak atu hakbesik an ba pesoal saude iha fatin vasinasaun sira atu simu vasina kontra Covid-19 hodi proteze an hosi perigu moras Covid-19 nebe alastra mundu tomak nebe afeta ona ema milhaun ba milhaun moras no mate. [ag]