‘Ó sai beik tiha ona ba rona.’ ~ Ebreu 5:11 NASB

Paulo hakerek: ‘Ó sai beik ona ba rona… tuir loloos agora daudaun ó sai ona mestre, ó presiza fila fali ema ruma hodi hanorin ba ó prinsípiu elementar sira… ó presiza fali susubeen no la’os hahán ne’ebé mak toos. Ba ema sira hotu ne’ebé mak presiza susubeen de’it… mak labarik ki’ik-oan. Maibe hahán ne’ebé mak toos ba ema sira ne’ebé mak adultu ona, ida ne’ebé mak tamba treina beibeik nune’e sira-nia sensu sira treinadu ona hodi distinge buat di’ak no buat aat.’ (Ebreu 5:11-14 NASB) Liafuan-xave ba iha leitura ohin nian mak tempu. Ba ema sira ne’ebé mak liafuan ne’e hakerek ba sira, sira iha disabilidade aprende nian: ‘Ó sai beik tiha ona ba rona,’ ne’e dehan katak ó neineik tebes hodi aprende. Iha tempu ne’ebé mak tuir loloos ó tama tiha ona ba iha universidade, ó tenke fila fali ba iha ensinu primáriu no aprende fila fali ABC sira. Iha tempu ne’ebé mak tuir loloos ó ko’alia kona-ba lia-loos nu’udar mestre sira, ó presiza fali ema ruma hodi ko’alia sai lia-loos ba ó.

Atensaun ba iha liafuan ida ne’e ‘hahán ne’ebé mak toos ba ema sira ne’ebé mak adultu ona.’ Se mak ema adultu ne’e? Ó adultu karik ó treina ó-nia an konstantemente liuhusi Na’i Maromak nia Liafuan. Marka ka sinal husi maturidade espiritual la’os kona-ba ó aprende barak hira ona, maibé kona-ba hira mak ó tau ona ba prátika. Iha mundu espiritual nian, kontráriu husi ignoransia la’os matenek ka koñesimentu, maibé obediénsia. Obedese ba Na’i Maromak nia Liafuan mak xave ba iha maturidade espiritual. Iha termu ne’ebé naruk, ó mantein 10% husi buat ne’ebé mak ó rona, ó mantein 50% husi buat ne’ebé mak ó haree, maibé ó mantein 90% husi buat ne’ebé mak ó halo. Entaun: ‘Labele rona de’it ba Na’i Maromak ninia Liafuan… halo buat ne’ebé mak Na’i Maromak nia Liafuan ne’e haruka. La’e karik, ó halo beik de’it ó-nia an… se ó halo saida mak Na’i Maromak nia Liafuan ne’e haruka… Na’i Maromak sei haraik bensaun ba ó tamba ó halo tuir Na’i nia Liafuan.’ (Tiago 1:22-25 NLT)    ~ SML

 

Hahán ba klamar: Jeremias 18-21 ; Lukas 2:41-52 ; Salmu 59:1-8 ; Proverbiu 14:21-22