Diretora Nasional World Vision Timor Leste (sorin karuk trazen mutin-metan)
& Dinora Granadeiru,
komisaria komisaun direitu ba labarik.
Diretora Nasional Organizasaun Internasional World Vision Timor Leste Migena Sulla, iha nia breves palavras iha serimonia entrega simu material eskolar no material ijiene iha sentru World Vision Segunda semana ne’e hateten, World Vision Timor Leste nudar organizasaun internasional ho nia misaun servisu ba hadia labarik sira nia situasaun iha familia uma laran, komunidade no sosiedade em jeral, parseria diak ho komisaun direitu ba labarik iha atividades barak relasiona ho labarik iha tinan barak.
World Vision entrega material eskolar no material ijieni ba komisaun direitu ba labarik hodi hakman uitoan labarik sira nebe atinjidu kalamidade dezastre inundasaun extrema iha 4 de Abril liu ba.
Advaiser externu Vorld Vision Antonio do Rasario ba jornalista sira esplika, tipu sasan material eskolar no material ijieni nebe World Vison oferese ba labarik sira atravez komisaun direitu labarik maka hanesan kadernu hakerek, kadernu pinta desenho, lapis no lapijera, mos ekipamentus protesaun saúde Covid-19 hanesan maskara no hand sanytaizer.
Komisaria komisaun nasional direitu labarik Dinora Granadeiro ba jornalista sira hateten, tuir dadus Ministeriu Solidaridade Sosial aserka de labarik rihun 2.000 resin iha kapital Dili maka rejistadu nudar vítima atinjidus kalamidade dezastre inundasaun extrema iha loron 4 de Abril liu ba.
Apoiu hosi World Vision loron ne’e sei aloka ba labarik benefisiariu nain 250 iha kapital Dili no iha munisipiu seluk. Kada labarik sei hetan pakoti ida hosi tipu sasan hirak nebe World Vision oferese. Dinora agradese ba apoiu World Vision ba labarik sira nebe afetadu dezastre naturais iha situasaun pandemia global Covid-19.
World Vision nudar perseiru importante ba komisaun direitu ba labarik iha promove no proteze direitu labarik sira iha Timor Leste tuir odem konstituisaun RDTL no konevensaun internasional direitu labarik. [ag]