‘Ha’u haree tiha ona saida mak sira halo, maibé Ha’u sei kura sira nafatin!’ ~ Izaias 57:18 NLT

Karik ó husu, ‘Karik tarde ona ba Na’i Maromak hodi halo buat ruma iha ha’u-nia moris?’ Nunka mais atu tarde ba Na’i Maromak! Iha Eskritura ita lee kona-ba ema sira ne’ebé mak rahun no Maromak foti sa’e fila fali sira liuhusi dalan ne’ebé mak maravillozu. Na’i Maromak uza Moises, ema oho-na’in ida, atu lori fila fali atan Ebraiku sira. Na’i Maromak uza Jacob, ema bosok-teen ida, hodi kumpri Ninia promesa ba Abraun.  Na’i Maromak mós uza Rahab, feto ida ne’ebé mak halo prostituisaun, no inklui nia iha Jesus nia bei-ala sira. No se Na’i Maromak resgata sira, Nia mós sei resgata ó. Rahun sei nunka atu bele limita ó. Maibé, nia sei liberta ó ba iha moris ne’ebé mak livre. Ema ne’ebé mak rahun tebes duni komprende realidade husi Jesus nia Liafuan: ‘Ketak husi Ha’u, ó sei labele halo buat ida.’ (João 15:5 NLT)

Ema ne’ebé mak rahun ne’ebé mak aprende hodi depende nia an ba iha Na’i Maromak mak forsa ida ne’ebé presiza atu konsidera. Bainhira ó haree ba iha pasadu ne’ebé mak sabraut ho fallansu, ne’e difisil ba ó hodi haree futuru ne’ebé mak nabilan, ne’e difisil hanesan ho bainhira ó lori kareta no hateke ba iha janela trazeira (kaca spion). Dalaruma ó presiza hodi hateke ba iha janela trazeira (kaca spion), maibé karik ó fokus ba iha ida ne’e, ó sei hakanek ó-nia an no ema seluk. Tamba ida ne’e mak kareta nia vidru ne’ebé mak hateke ba oin bo’ot liu duké janela trazeira (kaca spion) – nia hatudu ba ó diresaun ne’ebé mak ó sei ba no la’os fatin sira ne’ebé mak ó liu tiha ona iha kotuk!

Bainhira ó fila fali ba Na’i Maromak, Nia sei perdua ó, Nia sei kura ó, no Nia sei uza ó ba iha Ninia propózitu sira. Na’i Maromak dehan, ‘Ha’u haree tiha ona saida mak sira halo, maibé Ha’u sei kura sira nafatin! Ha’u sei gia sira. Ha’u sei fó komfortu ba sira ne’ebé mak triste, no lori liafuan hahii nian ba iha sira-nia ibun.’ (Izaias 57:18-19 NLT)

Liafuan ba loron ohin mak – laiha ida mak tarde ba Na’i Maromak!     ~ SML

Hahán ba klamar: Jeremias 25-27 ; Lukas 3:11-20 ; Salmu 64 ; Proverbiu 14:25-28