Taur Matan Ruak, Primeiru Ministru RDTL (Foto fontes: google)
Primeiru Ministru RDTL Jeneral Taur Matan Ruak iha Palasiu Prezidente Nicolau Lobato Kinta semana ne’e relata ba prezidenti da republika DR. Francisco Guterres Lu-Olo sobre lalaok no evolusaun husi atividades governu ligadu ho prevensaun no mitigasaun Covid-19. Primieru ministru revela ba prezidenti Lu-Olo kona ba perigu husi variante Delta Covid-19 nebe besik ona iha Timor-Leste.
Ba jornalista sira Primeiru Ministru esplika, prezidenti Lu-Olo preokupa maka’as ho ameasa husi perigu varianti foun Delta Covid-19 nebe to’o ona odamatan Timor Leste ka tama ona iha nasaun vizinhu Indonesia. Felizmente to’o minutu ikus evolusaun Timor Leste iha progresu vasinasaun Covid-19 lao diak ho persentazen vasinasaun kontinua sa’e husi loron ba loron, no númeru kazu ativu kontinua tun bebeik. maske nun’e Primeiru Ministru aviza ba sosiedade tomak nasaun laran katak, hanesan impozisaun Indonesia nebe halo ona lockdown extraordenariu, iha tempu badak governu mos sei taka fronteira Timor Leste nudar opsaun ida hodi prevene perigu hosi ameasa bo’ot varianti Delta Covid-19 ba sosiedade nasaun laran.
Primeiru Ministru alerta sosiedade tomak nasaun laran atu prepara an simu buat diak, maibe mos tenke prepara an hodi simu buat ‘aat ka senario pior tanba perigu variante foun Delta Covid-19 karik alastra tama nasaun laran. Tanba maske sei taka fronteira, populasaun labele espekta katak sei laiha ona ema ruma tama ilegalmente iha frontera nebe lalori transmisaun perigu variante Delta Covid-19. [ag]