Prezidente da Republika Demokrátika Timor Leste DR. Francisco Guterres Lu-Olo, (Fontes foto: tatoli.tl/google)
Prezidente da Republika Demokrátika Timor Leste DR. Francisco Guterres Lu-Olo, iha nia intervensaun ba serimonia despedida atletas jogus olímpiku iha Palasiu Prezidente Nicoalu Lobato Sesta semana ne’e apresia no hato’o parabens no deseju susesu ba atleta jogus Olímpiku nain tolu Imelda Ximenes Belo no José da Silva Viera nudar Atleta natasaun nani, no Felizberto de Deus nudar atleta halai iha jogus Olímpiku iha Tokyo Japaun.
Prezidenti Lu-Olo husu ba atleta nain tolu atu infrenta kompetisaun iha jogus Olímpiku ho aten barani no neon metin ho forsa vontade makas, determinasaun no persistensia. Atleta nain tolu nia partisipasaun iha Tokyo Japaun fo ona orgulhu no onra b’oot ba nasaun. Prezidenti Lu-Olo hein atleta nain tolu bele hatudu ba mundu katak Timor Leste nasaun kik ida mos bele kompete ho nasaun seluk iha jogus nivel internasional. Vitoria nebe karik atelta sira konkista sei fo onra bot liu tan nasaun Timor Leste, maibe importanate liu laos manan ka lakon maibe oinsa atleta sira involve iha kompetisaun ho dignidade.
Tuir Prezidenti Lu-Olo Jogus Olímpiku nudar instrumentu ida hodi povu sira bele hakbesik an ba malu hodi hametin dame. No Timor Leste ho Japaun sai ezemplu diak oinsa povu nasaun rua hakbesik an ba malu liu husi jogu Olímpiku, tanba liu husi desportu mos bele eduka ema. Prezidenti Lu-OLo agradese ba governu Japaun nebe fo apoiu tomak ba atleta olímpiku Timor Leste hodi bele partisipa iha jogus Olímpiku tinan 2021 nian ne’e iha Tokyo Japaun.
Atleta olímpiku Imelda Ximenes hateten, maske sira infrenta difikuldade barak iha preparativus tanba limitasaun infrestruturas ba treinamentu tuir modaliade nebe sira asumi, nudar atleta nebe reprezenta nasaun ba nivel jogu internasional sira prepara tuir kondisaun mínimu nebe iha ho ispíritu no vontade bo’ot hodi ba involve iha jogus Olímpiku. Imelda hateten, Sira kaer ba mensazen hosi Prezidente da Republika katak se wainhira sira konkista vitoria sei foti liu tan nasaun nian naran maibe wainhira karik sira lakon tenke lakon ho dignidade.
Sekretariu Estadu Juventude no Desporto Abrão Saldanha esplika, kontijenti atleta Timor Leste sei aranka ho atleta nain tolu nebe sei involve iha modalidade jogus olímpiku rua maka halai metro 1.500 no natasaun nani distansia metro 50. Atleta Imelda Ximenes no José da Silva Viera nudar Atleta natasaun nani sei kompete iha nani ho distansia metro 50, enkuantu atleta Felizberto de Deus nudar atleta halai nebe sei kompete iha halai ho distansia metro 1.500.
Sekretariu Estadu mensiona, Partisipasaun atelta Olímpiku Timor Leste nudar obrigasaun ida husi estadu membru komite Olímpiku internasional sira nebe tenke priense. Tanba ne’e, maske nasaun infrenta difikuldade oin-oin iha pandemia Covid-19 no dezastre naturais Timor Leste kontinua hatudu existensia no rejiliensia iha situasaun disfisil no bele konvive ho nasaun internasional sira iha jogus olímpiku. Torneiu olimpiku ne sei hahú iha loron 23 de juilu to’o remata iha loron 8 de agostu 2021.
Orsamentu nebe aloka ba kontijentis Olímpiku ne’e ho montante total rihun 48.000 dolares Americano. Despeza bot liu hosi kontijentis atleta ne’e barak liu aloka ba kustu bileti aviaun nian, tanba iha situasaun pandemia laiha aviaun kumersial nebe semo. Relasiona ho dezafius no regras protokolu Covid-19 nebe atleta sira tenke priense, sekretariu estadu esplika, iha prosesu tomak atleta Olímpiku sira submete ona no sei submete ho lolós ba detalhes tomak husi rekejitus protokolu Covid-19 rigurozu nebe komite Olímpiku aplika to’o ba iha kulmine implementasaun torneo jogus Olímpiku iha Tokyo Japaun. [ag]