Francisco Jerónimo, Ministru Assuntu parlamentar no Komunikasaun Sosial.
Ministru Assuntu parlamentar no Komunikasaun Sosial Francisco Jerónimo iha plenaria Parlamentu Nasional Segunda semana ne’e informa ba deputadu sira katak, governu halo ona prosesu subsidiu finanseirus ba propinas ba estudantes universitariu sira. Governu sei transfere osan subsidiu propines estudantes ne’e ba konta bankaria kada instituisaun universidade atu instituisaun universidade sira hodi aloka ba pagamentu orsamentu propinas estudantes benefisiariu sira. Hatan kona ba problema rekrutamentu profesores universitariu atus 900 nebe sai kestaun ba deputadu sira durante ne’e, ministru konfirma, governu halo prosesu atu rekruta profesores permanenti hosi profesores kontratadu sira iha maibe governu la halo rekrutamentu profesores foun.
Hatan ba pergunta deputadu sira kona ba prosesu implementasaun internet fibra optica, ministru esplika, internet fiber optic mai hosi Australia no sei too ona iha Timor Leste iha tinan 2022. Tuir ministru, internet fibra optica ne’e sei fornese rede internet kualidade adekuadu ho kustu baratu ba sosiedade nasaun laran. [AG]