DR. Francisco Guterres Lu-Olo, Prezidenti da Republika. (Foto: Andre Gusmão/Ravoz)
Prezidente da Republika Demokrátika Timor Leste DR. Francisco Guterres Lu-Olo iha nia diskursu ba serimonia selebrasaun loron nasional Funsaun Públika ba dala-7 iha salaun edifisiu CNE Kinta semana ne’e hateten, funsionariu funsaun públika tenke serví povu ho étika no ho profisonalizmo. Iha kontestu atual pandemia Covid-19 nivel nasional no internasional pandemia Covid-19 nasaun hasoru dezefius barak. Kalamidade husi dezastre natural iha loron 4 fulan abril liu ba hatodan liu tan situasaun nasaun iha pandemia Covid-19. Situasaun real ne’e ijize ajentis no funsionarius públiku sira nia dedikasaun no efikásia ás liu husi babain atu serví nafatin sidadaun hotu ho onra no exelensia.
Estadu no ajentes funsaun públiku nia kna’ar importante ohin loron nian maka halao atividades nesesarius hodi halakon kalamidade saude públika nebe nasaun infrenta to’o ohin loron nebe difini iha dekretu prezidensial no dekretu governu hodi implementa deklarasaun Estadu emerjensia husi Prezidente da Republika. Pandemia Covid-19 afeta sidadaun hotu iha mundu tomak inklui Timor Leste, tanba ne’e luta hosoru pandemia Covid-19 tenke sai kna’ar komponenti tomak nasaun estadu governu ajentes no funsionarius públikas no kada ema sidadaun Timor oan ida-idak nian.
Prezidenti fo hanoin ba ajentes no funsionarius funsaun públiku sira tenke asumi responsabilidade ás liu, tenke sai ezemplu pozitivu no lori mensazen klaru ba povu tomak oinsa hasés an hosi moras Covid-19. Funsionarius no ajentes funsaun públiku sira tenke fo ezemplu ba povu tomak atu simu vasina, no tenke hatene hatan ba prioridades sira iha Nasaun nia luta hodi elimina lalais kalamidade nebe Nasaun hasoru hela. Prezidenti da Republika mos husu ba funsionarius no ajentis públika sira atu labele haluhan kna’ar sira seluk administrasaun públika nian iha kada ministeriu ida-idak nian ho empeniu dedikasaun no efikásia biar maske hasoru fukun no restrisaun oi-oin.
-Prezidenti Lu-Olo iha nia mensazen ba celebersaun loron funsaun públika ba dala-7 ho tema “Ábito saudavel ho promusaun vasina hasoru Covid-19 nudar dalan ba normalidade foun iha atendementu públiku” ne konvida povu tomak atu rekuinese no sauda motiva no kolabora liu tan Ministeriu Saúde, médiku saúde nian doutores enfermeirus no partes sira hotu nebe ariska vida rasik infrenta hasoru Covid-19. Prezidenti Lu-Olo alerta ba povu tomak katak, vasinasaun kontra covid-19 nudar esforsu guvernu hodi prevene no kontrola moras Covid-19 atu lori lalais povu fila hikas ba situasaun moris normal babain, hodi bele ajuda lalais liu tan prosesu hodi hahú dezenvolvimentu sustentavel nasaun nian. [ag]