Espoza Prezidente da Republika Cidália Nobre Guterres (Foto: fontes google).
Espoza Prezidente da Republika Cidália Nobre Guterres iha okaziaun nia vizita umanitaria ba populasaun vítimas dezastre naturais iha rezidensia chefi aldeia Manu Mata suco Bidau Santana postu administrativu Cristo Rei Sesta semana ne’e ba jornalista sira hateten, nudar inan ba nasaun no nudar feto Atauro oan nia kontenti wainhira Governu deklara ona estatutu munisipiu espesial ba Atauro. Relasiona ho estatutu munisipiu espesial ne’e Cidália apela ba populasaun Atauro oan hotu atu unidus prepara an hanoin lisuk programa prioridades nebe atu implementa iha estatutu espesial Atauro nebe ofisialmente governu sei lansa iha loron 1 de janeiro 2022.
Cidália husu ba populasaun Atauro oan hotu evita sentimentu no estetimentu rasismo no hanoin diskriminativu ba malu entre Atauro oan hodi nune implementasaun estatutu munisipiu espesial Atauro bele lao diak. Cidália apela propriamente ba feto Atauro oan sira hotu atu prepara an ho programas diak sira hodi tama involve iha dezenvolvimentu munisipiu espesial atu nune feto Atauro oan sira labele sai fali bainaka iha rain ka uma rasik.
Hanesan hatur ona iha konstituisaun RDTL nebe ordena estatutu espesial ba ilha Atauro, konselu ministru aprova ona dekretu lei kona ba estatutu munisipiu espesial Atauro nebe tama ona iha aprovasaun Parlamentu nasional. Nune iha fulan Junhu liu ba Primeiru Ministru RDTL Jeneral Taur Matan Ruak iha nia diálogu ho lideres komunitaria sira iha suku Vila Maumeta Atauro, deklara nakloke ona ba povu katak hahú loron 1 de Janeiro 2022 Atauro sai ona munisipiu espesial. [ag]