Primeiru Ministru RDTL jeneral Taur Matan Ruak. (Fontes foto: google)
Primeiru Ministru RDTL jeneral Taur Matan Ruak iha Palasiu Prezidente Nicolau Lobato Kinta semana ne’e atualiza ba prezidente da Republika Dr.Fancisco Guterres Lu-Olo katak, evolusaun programa vasinasaun kontra covid-19 lao diak, no husi kuantidade doze vasina rihun atus 460.000 resin nebe Timor Leste simu aplika tiha ona doze rihun atus 300.000 resin.
Governu mos preve ona atu simu tan vasina husi rai liur hodi atinji persentazen máximu sidadaun simu vasina ho prioridade fokasaun ba munisipiu sira iha linha frontera hanesan Bobonaro, Covalima, Oecusse no munisipiu kapital Dili. Governu mos taka ona fronteira nebe la permite ema tama mai nasaun laran eseptu sasan nesesidade esensias sira.
Primeiru Ministru simu orientasaun hosi xefi Estadu atu kontrola makaas fronteira hodi satan transmisaun variante delta-19 husi teritoria Indonesia iha fronteira. Ligadu ho kazu falsifikasaun dadus vasina nebe involve pesoal saude, Primeiru Ministru rekuinese polísia kaer ona sidadaun balun nebe deskonfia involve iha falsifikasaun dadus vasinasaun no submete ona ba investigasaun.
Maibe seidauk iha informasaun no justifikasaun ruma kona ba falsifikasaun dadus vasinasaun ho involvimentu pesoal saude. Primeiru ministru apela ba povu tomak atu keta monu ba informasaun falsu. [ag]