Prezidente da Republika Demokrátika Timor Leste DR. Francisco Guterres Lu-Olo, simu vasina segundu doze.
Prezidente da Republika Demokrátika Timor Leste DR. Francisco Guterres Lu-Olo ho nia espoza Cidália Nobre Guterres iha palasiu Prezidente Nicolau Lobato Sesta semana ne’e kompleta simu vasina astrazeneka ba segundu doze. Prezidente Lu-Olo iha nia intervensaun antes simu vasina ne’e hateten, Virus Covid-19 oho ona ema milhaun tolu resin iha mundu tomak inklui Timor Leste, no fo hanoin ba povu tomak kona ba perigu husi ameasa variante foun delta-19 nebe mos oho dadauk ema barak. Tanba ne, hanesan nasaun hotu iha mundu halo katak vasina maka nudar meius úniku hodi hasa’e imunidade ema nian no proteze ema hotu husi ameasas atake virus corona Covid-19, Timor Leste mos presiza vasina. Tanba ne’e Prezidenti da Republika husu povu tomak atu hakbesik an ba iha postu vasina sira hodi simu vasina atu proteze an no familia rasik no proteze komunidade tomak husi moras Covid-19.
Enkuantu Diretora Jeral Saúde Públiku, Ministra Saúde dra. Odete da Silva Viegas ba jornalista sira hateten, Prezidenti da Republika ho espoza kompleta vasina segunda doze hatudu ezemplu bo’ot ba povu tomak atu banati tuir partisipa simu vasina hodi proteze an husi perigu Covid-19.
Dra. Odete esplika, ba nivel nasional atinji ona ema rihun atus 333.000 simu vasina primeira doze no segundu doze atinji ona ema rihun 50.000 maka simu ona vasina. To’o minutu ikus total komulativu persentazen Timor Leste atinji ona 35% total numeru idade vasina rihun atus 700 resin populasaun maka simu ona vasina. [ag]