‘Vale Achor nian sei sai odamatan ba esperansa nian.’ ~ Ozeias 2:15 

Referénsia Bíblika nian kona-ba vale sira jeralmente simboliza estadu dezesperadu nian ka laiha esperansa nian. Vale Achor nian [‘Problema’] hetan nia naran nune’e bainhira Akhan ninia família simu kastigu hodi hetan tuda ho fatuk to’o mate no arma sira Izraél nian lakon iha funu (haree iha Josué 7:25-26). Sentimentu dezesperu ne’e hanesan  parte ida husi kondisaun ema umanu ida nian, no istória ninia erói sira ne’ebé mak koñesidu barak mak esperiénsia ida ne’e. William Penn dehan, ‘Kuaze laiha buat ida iha ita-nia sorin-sorin aleinde rahun no dezesperu.’ Lord Shaftesbury anunsia, ‘Laiha buat ida mak bele salva Impériu Britániku husi mout.’ Benjamin Disraeli deklara, ‘Iha indústria nia laran, komérsiu nia laran, no agrikultura nia laran laiha esperansa.’ No Lord Grey lamenta katak, ‘Ahi sira sei mate hotu iha Europa nia laran tomak; ita sei la haree tan naroman iha ita-nia moris tomak.’

Iha opozitór sira no profeta desgrasa nian iha fatin hotu-hotu no, se ó sosa saida mak sira fa’an, ó sei hetan konvense husi sira katak laiha ona esperansa ba ó-nia situasaun. Laiha buat ida ne’ebé mak bele do’ok liu husi lia-loos! Apóstolu Paulu hateten, ‘Mai ita kaer metin nafatin ba esperansa ne’ebé mak ita fiar, tamba Nia ne’ebé mak fó promesa hirak ne’e hotu mai ita fiél tebes duni.’ (Ebreu 10:23 NKJV)

Na’i Maromak bele transforma ó-nia ‘Vale Achor nian’ sai ‘odamatan ba esperansa nian’. Ida ne’e mak promesa ne’ebé hanesan ho ida ne’ebé mak Nia halo ho Ninia ema sira depoizde sira fila kotuk ba Nia. Nia dehan iha Izaias 65:10 GWT, ‘Vale Achor nian sei sai fatin deskansa nian… ba Ha’u-nia ema sira ne’ebé mak buka Ha’u.’ Nu’udar buat ne’ebé mak Henry Blackaby observa: ‘Optimista sira la ignora difikuldade sira, maibé koñesimentu kona-ba Na’i Maromak ninia prezensa prevene sira hodi sai diskorajen… Ne’e imposível hodi hamriik iha Na’i Maromak nia prezensa no sai pesimista. Bainhira ita fokus liu ba iha ita-nia problema sira, problema sira sei bo’ot liu tan. Maibé bainhira ita fokus liu ba Na’i Maromak ita haree ita-nia situasaun sira ho perspetivu no iha fiar katak buat hotu ne’e posível.’

Hahán Espiritual: Ezekiel 24:1-27:24 ; Lukas 20:1-8 ; Salmu 20 ; Provérbiu 19:24-29