‘To’o bainhira tan mak Ita-Bo’ot sei subar Ita-Bo’ot nia oin husi ha’u?’ ~ Salmu 13:1 NIV

Bainhira Kelly James ho ninia maluk na’in-rua ne’ebé sa’e foho mate iha Foho Hood Oregon iha USA, ninia maun ho naran Frank, profesór teolojia nian, admite katak: ‘Ko’alia ho maneira abstratu kona-ba mate ne’e buat ida. Ne’e buat seluk ida bainhira hasoru ho mate husi ema ne’ebé mak ita hadomi… Mate ne’e aat. Ita labele – no tuir loloos labele duni – hodi koko halo mate ne’e sai di’ak liuhusi liafuan piedoza sira… Pergunta ida mak tuir beibeik ha’u, “Na’i Maromak iha ne’ebé bainhira Kelly nakdedar tamba malirin to’o mate?” Mai ha’u, bainhira ha’u la husu pergunta, ne’e sai nu’udar fallansu bo’ot ida tamba la sériu ho Na’i Maromak… Ha’u la sujere ema baibain hodi hamriik ba iha julgamentu Na’i Maromak nian… Na’i Maromak la hato’o reportasaun mai ha’u. Maibé pergunta ida ne’ebé onestu ne’ebé mak sai husi fuan ida ne’ebé mak rahun mak buat ne’ebé di’ak no loos.’

Liurai David la ta’uk hodi husu ba Na’i Maromak, ‘To’o bainhira tan mak Ita-Bo’ot sei subar Ita-Bo’ot nia oin?’ No liutiha versu balun, liurai David ne’ebé mak angustiadu ne’e deklara, ‘Maibé ha’u fiar ba Ita-Bo’ot nia domin ne’ebé mak nunka falla.’ (Salmu 13:5 NIV)

Frank James kontinua: ‘Iha konsternasaun (ka kekhawatiran) espirituál hotu nia laran, Na’i Maromak manifesta Nia-An iha ha’u-nia tristeza. Ho maneira balun, ita bele hetan Na’i Maromak bainhira ita iha desepsaun nia laran, iha konfuzaun nia laran no iha emosaun kruél sira nia laran. Ida ne’e la tama mai ha’u-nia lójika, no ha’u mós la gosta ida ne’e. Maibé ha’u-nia konseitu fiar nian sai tiha ona Abraámiku nian… Ha’u tenke fiar nafatin ba Na’i Maromak maske ha’u la komprende… nu’udar buat ne’ebé mak ema kristaun sira konfesa tiha ona durante tinan barak nia laran katak, “Ami hein ba iha resureisaun husi ema mate sira” (haree iha 1 Korintu 15:42)… Iha matabeen nia laran ne’ebé mak to’o hodi enxe oseanu ida… ita tenke hakoi ema ne’ebé mak ita hadomi. Maibé ita hakoi sira ho promesa ida ne’e, “Nu’udar iha Adaun ema hotu mate, nune’e mós iha Kristu ema hotu sei hetan moris fila fali.” ( 1 Korintu 15:22 NIV) Ida ne’e sei la indeniza (ka segura) ita husi tristeza… Ida ne’e, lori fé ba to’o iha profundidade iha ne’ebé esperansa komesa mosu sai mai liuhusi fuan ne’ebé mak moras, hanesan ho loromatan nia roman ne’ebé mak borus husi lalehan ne’ebé mak taka metin ho kalohan.

Hahán Espiritual: Juízes 16:23-31 ; 2 Korintu 12:7-10