Primeiru Ministru RDTL, Jeneral Taur Matan Ruak (Foto: fontes google).
Primeiru Ministru RDTL Jeneral Taur Matan Ruak iha Palasiu Prezidenti Nicolau Lobato Kinta semana ne’e atualiza ba Prezidente da Republika DR. Francisco Guterres Lu-Olo kona ba pontu situasaun Covid-19 iha nasaun laran. Ba jornalista sira Primeiru Ministru esplika, serka sanitaria ba munisipiu Ermera nudar opsaun polítika Governu hodi evita moras Covid-19 da’et ba populasaun iha munisipiu sira seluk. Govenu prepara intervensaun hodi neutraliza ekonómia povu munisipiu Ermera tanba povu Ermera depende liu ba rekursu ekonomia kafé.
Maibe Primeiru Ministru mos husu ba populasaun munisipiu Ermera atu partisipa iha kampanha vasinasaun nudar dalan úniku hodi proteze siguransa saude populasaun sira husi moras covid-19, tanba tuir dadus Ermera nudar munisipiu ikus liu ho númeru vasinasaun kik 12%. Primeiru ministru preokupa makaas ho variante Delta-19 nebe dezenvolve makaas iha nasaun vizinhu Indonesia no kona tiha ona Timor Leste. Primeiru Ministru mos preokupa makaas ho pasazen ilegal sira iha fronteira nebe kontinua akontese nafatin. Governu serbisu makaas no kordena ho autoridade Indonesia hodi kontrola didiak pasazen ilegal sira iha fronteira.
Hatan kona ba impresasaun públiku ba ezekusaun orsamentu Estadu tinan 2021 nian, Primeiru Ministru hateten, ezekusaun orsamentu estadu tinan 2021 nian Governu la hare ba volume ezekusaun orsamentu, maibe hare liu ba efetividades gastu orsamentu. Tanba karater orsamentu Estadu tinan 2021 nian bazeia ba baze programa. No restu orsamentu Estadu nebe Governu la konsege gasta naturalmente sei fila hikas fali ba kofre Estadu. [ag]