‘Ha’u haree, no hateke ba, ema lubun bo’ot ida ne’ebé mak ema labele sura.’ ~ Apokalipse 7:9 NKJV

Bainhira ko’alia kona-ba muda ba ó-nia uma ne’ebé mak ó mehi, pergunta seluk ne’ebé mak importante mak ida ne’e: Ema oinsá mak hela iha ó-nia sorin-sorin? Deskreve ksolok Lalehan nian, Joaun hakerek: ‘Depoizde buat hirak ne’e hotu ha’u haree, tebes duni, ema lubun bo’ot ida ne’ebé mak ema labele sura, husi nasaun hotu-hotu, suku hotu-hotu, povu hotu-hotu no lian hotu-hotu, hamriik iha tronu nia oin no iha Bibi Oan nia oin, hatais ho unuk mutin, no kaer ramus-tahan iha sira-nia liman, no hakilar ho lian maka’as, dehan, “Salvasaun mai husi ita-nia Maromak ne’ebé mak tur iha tronu, no husi Bibi Oan [Jesus]!’” (Apokalipse 7:9-10 NKJV)

Autór ida ho naran Max Lucado konta istória ida kona-ba ninia kolega, naran Joy, ne’ebé mak nu’udar mestra ida iha eskola domingu nian no estudante feto-oan ida ho tinan sia ne’ebé mak moe-dór ho naran Barbara iha nia klase laran. Nia mak labarik desprivilejiada (ka kurang mampu) ida husi fatin ki’ak ida iha sidade. Lucado hakerek: Kondisaun uma laran nian ne’ebé mak difísil halo nia senti ta’uk no inseguru.  Durante semana hirak ne’ebé mak ha’u-nia kolega hanorin iha aula laran, Barbara nunka ko’alia. Nunka. Bainhira labarik sira seluk ko’alia, nia tur. Bainhira labarik sira seluk kanta, nia nonook. Bainhira labarik sira seluk hamnasa, nia nonook. Sempre prezenti. Sempre rona. Sempre la ko’alia buat ida. To’o iha loron ida Joy fó aula kona-ba Lalehan. Joy ko’alia kona-ba haree Na’i Maromak. Nia ko’alia kona-ba matan ne’ebé mak laiha matabeen no moris ida ne’ebé mak laiha mate. Barbara fasinada (ka terpesona). Nia labele husik Joy husi ninia matan nia haree. Nia rona ho hamlaha. No nia foti sa’e nia liman. “Señora Joy?” Joy hakfodak. Barbara nunka atu husu pergunta ruma durante ne’e. “Sin, Barbara.” Barbara ne’ebé mak ho tinan sia husu, “Será ke Lalehan ne’e ba labarik feto sira ne’ebé mak hanesan ha’u?”’ Ninia resposta mak sin! Lalehan ne’e kria ba Barbara – no mós ba ó.

Hahán Espiritual: Ezekiél 16:53–19:14 ; Lukas 19:11-27 ; Salmu 103:13-22 ; Provérbiu 19:17