‘Labele para hodi hanoin kona-ba buat sira ne’ebé mak iha valór duni.’ ~ Filipe 4:8 CEV

Hateten katak iha tinan 1949 Kapitaun Edward Murphy, enjiñeiru ida ne’ebé mak servisu ba iha projetu ba Forsa Aérea Amérika nian, sai hirus tamba sensor ida ne’ebé mak konekta sala. Dehan ba tékniku ne’ebé mak responsável, Murphy hateten, ‘Karik iha maneira hodi halo servisu ne’e sala, nia sei hetan ida ne’e!’ Liutiha tempu barak, pensamentu ida ne’e sai koñesidu ho naran Lei Murphy nian.

Bazikamente, lei ne’e hateten nune’e, ‘Laiha buat ida ne’ebé fásil hanesan ho oinsá buat ne’e paresidu ka haree husi li’ur. Buat hotu lori tempu naruk liu duké buat ne’ebé mak ó espera, no karik buat ruma bele la’o sala, nia sei – iha momentu posível ne’ebé mak aat liu tan.’ Negativu tebes! Sé mak sei goza ninia moris karik nia moris tuir filozofia ida ne’e? Tamba sira sempre hein ba iha ida ne’ebé mak aat liu – sira sei hetan ida ne’e duni! Na’i Maromak nia Lei totalmente la konkorda ho Murphy nia Lei. Karik mundu espera atu Murphy nia Lei opera iha sira-nia moris, maibé, nu’udar Na’i Maromak nia oan ne’ebé mak redimidu (ka ditebus) husi Kristu, ó tenke rejeita pensamentu hanesan ne’e no hako’ak Na’i Maromak nia Lei. Iha esénsia, ida ne’e mak buat ne’ebé Na’i Maromak nia Lei hateten: ‘Karik buat ruma bele la’o loos, nia sei la’o loos duni. Laiha buat ida ne’ebé difísil hanesan ho oinsá buat ne’e haree ka paresidu husi li’ur. Buat hotu iha ninia benefísiu ne’ebé mak barak liu duké oinsá buat ne’e paresidu ka haree husi li’ur, no karik buat di’ak ruma bele akontese ba ema ruma, buat di’ak ne’e mós sei akontese mai ha’u.’

Hanoin tok ba oinsá ó bele goza ó-nia moris ne’e di’ak liu tan karik ó-nia hanoin sira tuir Na’i Maromak nia Lei no la’os tuir Murphy nia Lei. Buat ne’ebé loos mak, Na’i Maromak iha moris ne’ebé mak di’ak liu ba ó – moris ida ne’ebé mak Nia hakarak ó atu goza ó-nia moris ho máksimu. Nune’e, envezde ó eksplode buat hotu sai husi ninia proporsaun no moris kontráriu ho Na’i Maromak nia Liafuan, hamriik ba iha promesa ida ne’e: ‘Ita hatene katak buat hotu lori ba di’ak ba ema sira ne’ebé mak hadomi Na’i Maromak, ba ema sira ne’ebé mak Na’i Maromak bolu tuir Ninia planu sira.’ (Roma 8:28 NKJV) Ida ne’e mak buat ne’ebé dehan katak moris tuir Na’i Maromak nia Lei – no la’os Murphy nia Lei!    ~ SML

Hahán ba klamar: Númeru 29:1-6 ; Mateus 24 ; Apokalipse 11:15-19 ; 1 Korintu 15:50-58