‘Na’i ó-nia Maromak sei haraik bensaun ba ó tuir buat ne’ebé mak Nia promete tiha ona.’ ~ Deuteronomiu 15:6 NLT

Dalaruma moris ne’e halo ó monu to’o ó dezisti (ka menyerah) hodi laiha tan esperansa ka fiar katak buat di’ak ruma sei akontese ba ó. Karik ida ne’e mak buat ne’ebé ó hasoru ohin loron, le’e liafuan hirak ne’e: ‘“Ha’u hatene planu sira ne’ebé mak Ha’u iha ba ó,” Na’i Maromak dehan. “Ne’e mak planu sira ba di’ak nian… hodi fó ba ó futuru no esperansa.”’ (Jeremias 29:11 NLT) Na’i Maromak iha planu ne’ebé di’ak mai ita ida-idak, maibé la’os ita hotu mak bele esperiénsia ba ida ne’e. Tamba saida? Iha razaun rua:

(1) Ita la komprende katak ita iha direitu sira no direitu espesiál sira ka priviléjiu sira. Ita fiar katak Na’i Maromak bele salva ita no lori ita ba Lalehan bainhira ita mate, maibé ita la hanoin katak Na’i Maromak bele halo buat ruma ba ita-nia pasadu, ba ita-nia prezenti ka ba ita-nia futuru.

(2) Ita hela iha kraik liu husi nível ne’ebé mak Nia hakarak ita atu hela ba tamba ita haree ita-nia an iha naroman ne’ebé mak sala. Ita fiar katak Na’i Maromak bele haraik Ninia bensaun ba iha ema sé de’it – ekseptu mai ita – tamba ita la merese. Na’i Maromak fó hatais ona ó ho Kristu nia lia-loos, nune’e ó merese duni iha Ninia haree no Nia iha planu sira hodi ‘haraik Ninia bensaun sira ba ó tuir buat ne’ebé mak Nia promete tiha ona’.
Iha tempu Bíblia nian bainhira liurai ida sa’e ba iha tronu hodi ka’er ukun, nia sei kaer liurai ida uluk nian hamutuk ho liurai ne’e nia família tomak hodi kondena sira hotu ba mate; hodi nune’e laiha ema ida tan mak sei hamriik hodi kontra nia. Tamba ne’e mak, bainhira liurai David sa’e ba iha tronu hodi troka liurai Saul, Mefiboset, liurai Saul nia bei-oan mane, halai ba iha ai-laran ho ta’uk. Maibé liurai David mak liurai ne’ebé mak diferente tebes. Envezde buka hodi halakon tiha ninia antesesór nia família sira, nia husu, ‘Sei iha ka ema ruma ne’ebé mak restu husi umakain Saul nian, hodi nune’e ha’u bele hatudu ba nia laran-di’ak tamba Jonatan?’ (2 Samuel 9:1 NKJV)

‘Tamba saida mak Na’i Maromak haraik bensaun mai ha’u?’ ó husu pergunta nune’e. Ninia resposta ne’e simples maibé klaru: tamba Kristu! ~ SML

Hahán ba klamar: Ezekiel 31-33 ; Lukas 20:20-26 ; Salmu 27 ; Provérbiu 20:5-6