‘Ha’u krusifika tiha ona hamutuk ho Kristu no ha’u la moris ona, maibé Kristu mak moris iha ha’u-nia laran.’ ~ Galatia 2:20 NIV
Ema barak ohin loron hakarak atu hetan buat ne’ebé mak barak ne’ebé mak sira bele ba sira-nia an rasik maibé hodi fó fila fali uitoan liu husi buat ne’ebé mak sira bele. Sira hakarak atu hamriik hamutuk ho sira-nia belun sira iha tempu di’ak sira, maibé lakon iha tempu sira ne’ebé mak ladún di’ak. Tristemente, estatístika nasionál sira konfirma falta komitmentu ida ne’e. Voluntáriu ba kauza sira ne’ebé mak iha valór duni tun maka’as teb-tebes. Tamba saida? Parte ida mak tamba ema sira lakohi hodi tau sira-nia an iha liña oin, ka hetan prezu ba iha responsabilidade sira. No iha mós ema sira ne’ebé mak lakohi hodi halo buat ruma ho gratuita bainhira sira bele hetan osan ka selu ba buat ne’ebé mak sira halo. Adisionalmente, iha mós ema sira ne’ebé mak dalabarak haree oportunidade sira hodi servi ema seluk hanesan obrigasaun ida, nune’e sira hadook-an tiha husi oportunidade hirak ne’e.
Ita mak jerasaun tata-lian nian ho tempu atensaun ne’ebé mak badak, ne’ebé mak akostumadu ho anúnsiu sira ho durasaun segundu 15 nian no ba fast food sira. Ita hakarak atu ita-nia pregasaun sira simples de’it, divertidu (ka menghibur) no ‘sente ba di’ak.’ Sin, komitmentu ne’ebé mak radikál ne’e raru (ka langka) tebes duni – maibé ida ne’e mak buat ne’ebé mak Na’i Maromak husu husi ó. Komitmentu ne’e katak ó-nia promesa sira kesi metin nafatin maske situasaun ne’ebé mak ó hasoru ne’e di’ak ka ladi’ak. Mai ita haree ezemplu sira balun kona-ba komitmentu nian ohin loron no mós iha aban.
Komitmentu ba kazamentu nian. Kazamentu, tuir buat ne’ebé mak Na’i Maromak haree, la’os aranjamentu 50/50 ka metade-metade nian. Ida ne’e nu’udar akordu mutuál nian hodi fó 100% husi ita-nia an. Ida ne’e nu’udar promesa ida ba moris tomak nian entre ó ho ó-nia kaben: ‘ba di’ak liu ka ba aat liu; ba iha riku liu ka ba iha ki’ak liu; iha moras sira no mós iha saúde di’ak sira; to’o mate mai haketak.’ No promesa ida ne’e sei fásil liu hodi moris tuir bainhira husi parte rua ne’e aprende tiha ona, hanesan apóstolu Paulu, hateten, ‘Ha’u krusifika tiha ona hamutuk ho Kristu no ha’u la moris ona, maibé Kristu mak moris iha ha’u-nia laran.’ Ida ne’e atu dehan katak mate ba iha interese an rasik nian mak xave ba iha relasionamentu di’ak sira. ~ SML
Hahán ba klamar: Ezekiel 34-36 ; Lukas 20:27-40 ; Salmu 78:1-8 ; Provérbiu 20:7-10