‘Husik tiha ó-nia dalan rasik, lori ó-nia krús loron-loron, no tuir Ha’u.’ ~ Lukas 9:23 NLT
Ida ne’e mak ezemplu Bíbliku tolu kona-ba komitmentu ne’ebé mak radikál:
- Komitmentu ba iha servisu nian. Iha tempu pasadu, empregadór sira apresia sira-nia traballadór sira ka servisu-na’in sira, no servisu-na’in sira valoriza sira-nia empregadór sira ka sira-nia patraun sira, no mós valoriza sira-nia servisu rasik sira. Servisu fatin ohin loron nian dalabarak liu envolve konflitu sira, ho servisu-na’in sira ne’ebé mak krítika sira-nia patraun sira no halo servisu mínimu liu duké buat ne’ebé mak rekeridu, no patraun sira barak mak sai ejijente liu, hodi halo laiha valór sira-nia servisu-na’in sira. Ida ne’e la’os Na’i Maromak nia dalan. Na’i Maromak nia dalan husu komitmentu mutuál entre manajementu no servisu. Apóstolu Paulu hateten: ‘Obedese ba ó-nia patraun sira iha rai ne’e ho respeitu ne’ebé mak kle’an no ho hamta’uk. Servi ba sira ho fuan loloos nu’udar ó servi ba Kristu. Koko hodi halo sira haksolok iha tempu hotu, la’os iha tempu ne’ebé mak bainhira sira atensaun hela ba ó de’it. Servisu ho entuziasmu, hanesan ó servisu ba Na’i Maromak, no la’os servisu ba ema.’ (Éfezu 6:5-8 NLT)
- Komitmentu iha igreja. Ema kristaun barak mak adopta tiha ona estilu-kafeteria nian hodi hakbesik ba iha igreja. Ita hili buat ne’ebé mak ita gosta no husik buat ne’ebé mak ita la gosta. Maibé filiasaun iha Kristu nia igreja envolve relasionamentu promesa nian ho isin-lolon husi ema fiar-na’in sira ne’ebé mak fó atensaun ba malu, fó kosolok ba malu, no reza ba malu, hodi hakompleta Komisaun Bo’ot hamutuk (haree iha 1 Korintu 12:12-31).
- Komitmentu ba Kristu. Kristu la buka segidór sira ne’ebé mak plin-plan no morna (ka suam-suam kuku) (haree iha Apokalipse 3:16). Nia dehan ba ema barak, ‘Se ema ida husi imi ne’ebé mak hakarak tuir Ha’u, ó tenke husik tiha ó-nia dalan sira ne’ebé mak egoísta, lori ó-nia krús loron-loron, no tuir Ha’u.’ Ida ne’e dehan katak ó la tuir tan ona ó-nia hakarak rasik sira, maibé ó tuir Kristu no Ninia hakarak sira. Ida ne’e mak komitmentu ne’ebé mak radikál, no ó simu bolu ba ida ne’e. ~ SML
Hahán ba klamar: Ezekiel 37:1-40:9 ; Lukas 20:41-47 ; Salmu 78:9-16 ; Provérbiu 20:11-14