‘Nia halo ida ne’e hodi halo parte hotu husi isin-lolon nian bele servisu hamutuk ho di’ak, ho kada parte ida-idak tau matan ba parte sira seluk.’ ~ 1 Korintu 12:25 CEV

Bainhira ko’alia kona-ba buka uma igreja nian, ó iha opsaun ne’ebé mak barak tebes. Tradisionál, kontemporáriu, ó fó naran ba ida ne’e – no ó sei bele hetan igreja ida ne’e! Maibé ó-nia fatin individuál iha Kristu nia Isin-Lolon mak buat ketak ida; ida ne’e la’os determina husi ó, maibé determina husi Na’i Maromak.

Bíblia dehan, ‘Liu husi Espíritu ida de’it, ita hotu-hotu batismu tiha ona hodi sai isin-lolon ida de’it.’ (1 Korintu 12:13 NKJV) Bainhira ó simu Jesus nu’udar ó-nia Salvador, ó sai tiha ona membru ba iha Ninia família ne’ebé mak redimidu (ka ditebus) no ‘milagre kolokasaun nian’ hola parte iha ó-nia laran. Ida ne’e la’os opsaun ida ba ó hodi hili; ida ne’e Na’i Maromak nia opsaun – no ida ne’e determina ó-nia identidade espirituál.

Apóstolu Paulu hateten: ‘Liu husi Espíritu ida de’it, ita hotu-hotu batismu tiha ona hodi sai isin-lolon ida de’it. Tantu ba ema Judeu ka ema Gregu, atan ka ema livre, Na’i Maromak haraik ba ita hotu-hotu Espíritu ida de’it.’ (1 Korintu 12:13 GWT)

Ida ne’e dehan katak kualkér ema iha kualkér fatin iha mundu ida ne’e, ne’ebé mak bolu Jesus nu’udar sira-nia Salvador no sira-nia Maromak, sira konektadu liu ba ó duké ó-nia liman konekta ba ó-nia pulsu. No ó iha papél hodi hala’o relasiona ho kada ida husi sira no hotu-hotu husi sira. Na’i Maromak la’os de’it tau ó  iha Ninia Isin-Lolon, Nia determina tiha ona ó-nia papél úniku bainhira Nia prepara ‘kada parte hirak ne’e… hanesan ho buat ne’ebé Nia hakarak atu sira hodi sai.’ (1 Korintu 12:18 NIV) Nia mós fó ba ó talentu ‘espesífiku sira’, no hein katak ó sei uza talentu hirak ne’e hodi kompleta Ninia objetivu sira (haree iha Roma 12:6-8).

Bainhira ó husu ba Na’i Maromak hodi hatudu ba ó ó-nia talentu sira, Nia sei hatudu duni ba ó. No bainhira Nia halo ida ne’e, ó tenke uza oportunidade sira hotu ne’ebé mak iha hodi uza ó-nia talentu sira ne’e hodi fó glória ba Na’i Maromak.   ~ SML

Hahán ba klamar: Ezekiel 46-48 ; Lukas 21:25-38 ; Salmu 78:40-55 ; Provérbiu 20:22-24