‘Ita hotu-hotu falla iha buat barak.’ ~ Tiagu 3:2 NKJV

Esforsu hodi bele halo di’ak liu tan mak buat ne’ebé di’ak, maibé koko hodi bele iha ekspektasaun sira ne’ebé mak realístiku. Buat hotu-hotu iha moris ne’e la’os de’it metan ho mutin; iha mós área sira ne’ebé mak sinzentu no mós área balun ne’ebé mak ‘iha klaran’ husi buat rua ne’e. Buat hotu labele nafatin perfeitu ba tempu tomak, no buat hotu mós la’os aat ba tempu tomak.

Deside hodi hakat liu tiha enkontru ida ka eventu sosiál ruma tamba de’it ó tarde minutu lima ka tamba de’it ó iha defeitu ka manxa ruma iha ó-nia oin, ka kansela viajen tomak tamba de’it viajen aviaun nian atrazadu, ka senti sai hanesan ema ida ne’ebé mak aat liu tamba de’it fallansu inosente ida, buat hirak ne’e dalaruma refere ba iha ‘polarizasaun’. Ida ne’e lori ba iha frustrasaun no negatividade.

Atu bele mantein ó-nia ksolok iha moris ne’e, ó tenke simu katak ó labele sai perfeitu ba iha tempu tomak, no nune’e mós ho ema sira ka buat sira ne’ebé mak iha ó-nia sorin-sorin. Bainhira ó espera perfeisaun husi moris ne’e, ó mós sei espera buat ne’ebé mak hanesan husi ema sira seluk. No tipu husi hanoin ne’ebé mak la realístiku ida ne’e la’os de’it sei hasoru ho desepsionamentu (ka kekecewaan) ne’ebé mak bo’ot bainhira ó-nia ekspektasaun sira ne’e ó la hetan, ida ne’e mós sei fó presaun ne’ebé mak todan tebes ba iha ema sira ne’ebé mak ó tau-matan ba no neineik-neineik ida ne’e bele destrói relasionamentu hirak ne’e. Tamba saida mak la fó tempu ba sira hodi deskansa no para hodi ejize buat ruma husi sira, buat ne’ebé mak sira la iha kapasidade hodi fó ba ó?

Apóstolu Tiagu dehan katak ita hotu-hotu falla, monu no sala iha buat barak. Nune’e, karik ita hotu-hotu halo fallansu – no ita halo duni fallansu – koko atu aprende hodi bele simu buat hirak ne’e hotu hanesan parte ida husi ema-nia esperiénsia, no relax de’it! Pergunta: iha dalan espesífiku ida ne’ebé mak ó presiza liu hodi bele simu, husi ‘área sira ne’ebé mak la perfeitu ne’e’ husi ó-nia moris rasik, ka iha dalan seluk bainhira ema seluk nia moris ninia área sira ne’ebé mak la perfeitu sira afeta ba ó? No molok ó atu hatán ba iha pergunta ida ne’e, hanoin uluk lai kona-ba ida ne’e: ‘Domin ne’e pasiénsia, domin ne’e jentíl.’ (1 Korintu 13:4 NIV)      ~ SML

Hahán ba klamar: Levítiku 16 ; Levítiku 23:26-32 ; Ebreu 9:1-14 ; Ebreu 13:11-16