‘Maibé bainhira laiha fé, ne’e imposível hodi bele fó ksolok ba Na’i Maromak.’ ~ Ebreu 11:6 NKJV
Baibain bainhira ko’alia kona-ba fé, ita hanoin liu kona-ba termu simu resposta ba iha ita-nia pedidu orasaun sira no simu husi Na’i Maromak buat sira ne’ebé mak Nia mesak mak bele fó. No ida ne’e di’ak hela. Maibé iha razaun ne’ebé mak importante liu hodi harii ó-nia fé. Fé ne’e kona-ba fó ksolok ba Na’i Maromak! ‘Bainhira laiha fé, ne’e imposível hodi bele fó ksolok ba Na’i Maromak, tamba ema sira ne’ebé mak hakbesik-an ba Na’i Maromak tenke fiar ba Na’i Maromak, no Na’i Maromak mak rekompensadór ba ema sira ne’ebé mak ho badinas buka Nia.’ Saida mak fó ksolok ba Na’i Maromak? Ó-nia fé! Saida mak la fó ksolok ba Na’i Maromak? Falta husi ó-nia fé!
Iha tempu uluk, dalaruma ema Kristaun sira deskreve kona-ba halo orasaun nakonu ho paixaun hanesan ho ‘invade portaun sira Lalehan nian’. Ida ne’e mak sentimentu ne’ebé mak sinseru tebes, maibé la kompletamente loos. Batalla ka funu ne’e la’os entre ó ho Lalehan! Ó iha bem-vindu iha tapete-mean hodi hakbesik-an ba Na’i Maromak iha kualkér tempu. ‘Mai ita hakbesik-an ho barani ba iha tronu grasa nian, atu ita hetan mizerikórdia no hetan bensaun hodi ajuda ita iha tempu ne’ebé mak ita presiza.’ (Ebreu 4:16 NKJV) Karik iha batalla ka funu ruma, ida ne’e entre ó no forsa sira husi infernu nian (haree iha Éfezu 6:12-18).
Tamba saida mak ita-nia orasaun sira dalaruma la efektivu? Bíblia hateten, ‘Liafuan ne’ebé mak sira rona la fó benefísiu ba sira, la mistura ho fé husi ema sira ne’ebé mak rona ida ne’e.’ (Ebreu 4:2 NKJV) Sin, Na’i Maromak movidu (ka tergerak) tamba ó-nia nesesidade sira, maibé Nia responde ba iha ó-nia fé. Tamba ida ne’e mak laiha buat seluk ne’ebé mak importante liu duké harii ó-nia fé. No oinsá mak ó bele halo ida ne’e? ‘Fé mai husi rona, no rona ba Na’i Maromak nia Liafuan.’ (Roma 10:17 NKJV) Ida ne’e funsiona hanesan ne’e: tama ba iha Na’i Maromak nia Liafuan, Na’i Maromak nia Liafuan tama ba iha ó-nia laran, halo orasaun, no buat sira komesa hodi muda sai di’ak liu tan iha ó-nia moris. ~ SML
Hahán ba klamar: 2 Korintu 9:1-11:15 ; Lukas 22:24-38 ; Salmu 24 ; Provérbiu 21:1-2