‘Ha’u halo orasaun atu ó bele prósperu iha buat hotu-hotu no iha saúde ne’ebé di’ak, hanesan ho ó-nia klamar prósperu.’ ~ 3 Joaun 1:2 NKJV

Jesus hateten, ‘Benefísiu saida mak iha ba ema ida karik nia manán mundu tomak, maibé lakon ninia klamar rasik?’ (Markus 8:36 NKJV) No atu lori fila Ninia pontu, Nia konta istória kona-ba ema riku ne’ebé mate no ba iha infernu, maibé ema ki’ak ne’ebé iha ninia odamatan ba iha Lalehan. Pontu importante: laiha buat ida mak importante liu duké ó-nia salvasaun!

Maibé Na’i Maromak mós iha planu ba ó-nia moris, no Nia hakarak atu ó susesu. Apóstolu Joaun hakerek, ‘Ha’u halo orasaun atu ó bele prósperu iha buat hotu-hotu no iha saúde ne’ebé di’ak, hanesan ho ó-nia klamar prósperu.’ Atensaun ba iha liafuan ‘iha buat hotu-hotu’. Ida ne’e inklui ó-nia saúde, ó-nia estabilidade mentál no emosionál, ó-nia família no ó-nia relasionamentu sira hotu, ó-nia kareira no finansiamentu sira hotu. ‘Buat hotu-hotu’ katak – buat hotu-hotu! Laiha área ida husi ó-nia moris mak Na’i Maromak la interese ka Na’i Maromak sei la envolve-An bainhira ó buka Nia, ó obedese ba Nia, no ó respeita Nia. Iha Testamentu Tuan, Nia dehan, ‘Kaer metin ba liafuan sira husi promesa ida ne’e, no halo tuir ba, ó sei prósperu iha buat hotu ne’ebé mak ó halo.’ (Deuteronómiku 29:9 NKJV) No iha Testamentu Foun, Jesus hateten, ‘Maibé buka uluk Na’i Maromak nia Reinu no Ninia lia-loos sira, no buat sira ne’e hotu sei aumenta ba ó.’ (Mateus 6:33 NKJV)

Ó investe totalmente ba iha susesu husi ó-nia oan sira, loos ga lae? Bainhira sira susesu iha moris ne’e, ó mós selebra ho sira, loos ga lae? Nu’udar Na’i Maromak nia oan ne’ebé mak redimidu (ka ditebus), ó-nia Aman iha Lalehan investe iha ó-nia susesu sira no selebra hamutuk ho ó.

Nune’e komesa halo orasaun no fiar ba Nia ohin loron ba iha susesu husi ó-nia esforsu sira hotu.  ~ SML

Hahán ba klamar: 2 Korintu 11:16-13:14 ; Lukas 22:39-53 ; Salmu 19 ; Provérbiu 21:3