‘Ita-Bo’ot halo sira sai ukun-na’in ba iha servisu sira husi Ita-Bo’ot nia liman nian; Ita-Bo’ot tau buat hotu-hotu iha sira-nia ain okos.’ ~ Salmu 8:6 NIV
Oinsá mak ó bele hatene katak Na’i Maromak hakarak atu ó susesu iha moris ne’e? Iha razaun tolu:
- Tamba Nia kria ó. Iha livru Génesis Na’i Maromak hateten, ‘Mai Ita kria ema tuir Ita-nia ilas, hanesan ho Ita.’ (Génesis 1:26 NKJV) Liafuan sira ‘ilas’ no ‘hanesan’ importante tebes. Hanoin kona-ba buat ida ne’e: dalaruma ita dehan ba labarik ida, ‘Ó mak ilas husi ó-nia mamá/ husi ó-nia papá. Ó hanesan tebes ho nia!’ Tamba ó mak Na’i Maromak ninia kriatura ne’ebé supremu, Na’i Maromak fakar ba ó Ninia hanoin, Ninia podér, Ninia matenek, no buat sira seluk tan ne’ebé mak ó presiza ba iha susesu. Bainhira ó komprende lia-loos kona-ba ida ne’e no komesa hodi halo asaun tuir ida ne’e, ó-nia perspektiva sei muda. Ó sei komesa hodi hanoin hanesan ‘ema ne’ebé mak laiha limite’.
- Tamba ó iha valór. Artista Ethel Waters, ne’ebé mak baibain kanta iha Billy Graham ninia kruzada sira, hateten, ‘Ha’u ema ruma, tamba Na’i Maromak la kria lixu ida!’ Nu’udar realizasaun kulminante husi Na’i Maromak ninia kriasaun, ó mak sai nu’udar objetu husi Ninia atensaun no domin. Salmista ne’e hakerek, ‘Presiozu tebes Ita-Bo’ot nia hanoin sira kona-ba ha’u, oh Na’i Maromak. Sira labele sura! Ha’u mós labele sura sira.’ (Salmu 139:17-18 NLT)
- Tamba buat hotu-hotu ne’ebé mak Na’i Maromak kria ne’e ba ó. ‘Ita-Bo’ot halo sira sai ukun-na’in ba iha servisu sira husi Ita-Bo’ot nia liman nian; Ita-Bo’ot tau buat sira hotu iha sira-nia ain okos.’ Karik ida ne’e dehan katak Na’i Maromak sei hamonu susesu ba iha ó-nia hiti leten? La’e, ‘Na’i Maromak fó bensaun ba sira, no Na’i Maromak dehan ba sira, “Fó fuan ba no multiplika ba; halo nakonu mundu no domina nia.”’ (Génesis 1:28 NKJV)
Na’i Maromak haraik tiha ona ba ó Ninia autoridade no abilidade kreativa atu bele susesu iha buat sira hotu ne’ebé mak Nia bolu ó ba hodi halo. Tamba ne’e, duké hanoin hanesan vítima ida – komesa hodi hanoin nu’udar manán-na’in ida! ~ SML
Hahán ba klamar: Kántiku sira 1-4 ; Lukas 22:54-62 ; Salmu 3 ; Provérbiu 21:4-8