‘Nune’e ó sei halo ó-nia dalan prósperu, no depois ó sei susesu ho di’ak.’ ~ Josué 1:8 NKJV

Iha Eskritura nia laran liafuan ‘susesu’ ho simples signifika katak hodi hatene no halo tuir Na’i Maromak nia hakarak sira ba ó-nia moris. Simples hanesan ne’e de’it! Ba Josué, susesu katak tama ba iha Rai Prometidu, konkista rai ne’e, hela iha rai ne’e, no hodi goza bensaun sira hotu ne’ebé mak iha husi rai ne’e loron-loron.

Rona ba saida mak Na’i Maromak dehan ba nia: ‘Só hodi sai forte no barani tebes, mak ó bele observa hodi halo tuir lei hotu-hotu ne’ebé mak Moisés, Ha’u-nia atan dehan ba ó hodi halo tuir; labele la’o sees husi lei ne’e ba loos ka ba karuk, atu nune’e ó prósperu nafatin iha fatin ne’ebé de’it mak ó ba. Livru Lei nian ida ne’e sei labele sees husi ó-nia ibun, maibé ó tenke medita nia loron no kalan, atu nune’e ó bele observa hodi halo tuir buat hotu ne’ebé mak hakerek iha laran. Nune’e ó sei halo ó-nia dalan prósperu, no… depois ó sei susesu ho di’ak.’ (Josué 1:7-8 NKJV) Susesu ne’ebé mak loos envolve buat tolu ne’e:

  • Sai saida mak Na’i Maromak hakarak ó hodi sai.
  • Halo saida mak Na’i Maromak hakarak ó atu halo.
  • Iha buat ne’ebé mak Na’i Maromak hakarak ó atu iha.

No bainhira ó atinje objetivu sira hotu ne’ebé mak Nia tau tiha ona iha ó-nia moris, ó sai susesu. Dale Carnegie (autór husi livru How To Win Friends and Influence People (ka Oinsá Atu Bele Manán Kolega Sira no Influénsia Ema Sira)) dala ida nia observa katak, ‘Susesu katak hetan buat ne’ebé mak ó hakarak. Kontente katak hodi hakarak buat ne’ebé mak ó hetan tiha ona.’ Iha sira-nia buka ne’ebé mak laiha limite ba iha konkista sira, ema balun sai ka’an-ten no ka’an-ten liu tan katak sira nunka sente kontente ho buat ne’ebé mak sira iha ona. No tamba sira sempre hakarak liu tan no liu tan beibeik, sira falla hodi goza saida mak Na’i Maromak haraik tiha ona ba sira. Susesu ne’ebé mak loloos la’os destinasaun ida; ida ne’e viajen ida. Ida ne’e mak kontente ida ne’ebé mak kria liuhusi progresu. Ida ne’e mak hodi hatene katak ó iha tiha ona Na’i Maromak ninia ‘oráriu’ nia laran bainhira ko’alia kona-ba Na’i Maromak ninia tarefa iha ó-nia moris. ~ SML

Hahán ba klamar: Kántiku sira 5-8 ; Lukas 22:63-71 ; Salmu 39 ; Provérbiu 21:9-13