‘Iha buat sira ne’e hotu, ita liu fali ema konkistadór sira.’ ~ Roma 8:37 NKJV
Se ó foti konkluzaun katak ó-nia loron di’ak sira remata tiha ona – sira sei remata duni. Se ó hanoin katak ó-nia loron di’ak sira sei iha – sira sei iha duni. Depoizde nia lakon ninia servisu ho kompañia Fortune 500, Leonard ta’uk no monu ba iha depresaun nia laran. No depois nia hanoin katak, se nia rende ho situasaun ne’ebé mak nia hasoru, saida mak nia sei hanorin ba nia oan mane? Se nia la ultrapasa ninia obstákulu sira, ninia oan mane mós sei husik atu ninia dezafiu sira halakon nia an. Leonard determinadu hodi hatudu ba nia oan mane katak maske nia aman monu, nia aman bele hamriik fila fali. Nune’e nia ke’e sai ninia CV no nia telefone ba ninia kolega sira hodi hateten ba sira katak nia presiza servisu. Fulan balun liu tiha no depoizde entrevista barak liu tiha, nia hetan oferta (ka penawaran) haat hodi servisu nian, no agora nia servisu ba iha kompañia ne’ebé mak valoriza ninia talentu.
Bainhira kolleita fehuk-ropa sira, agrikultór sira husi Idaho nian sei hafahe fehuk-ropa sira ne’e tuir fehuk-ropa sira nia tamañu: ki’ik, natoon no bo’ot. Maibé agrikultór baibain ne’ebé mak la halo tuir prátiku ida ne’e, hetan osan barak liu duké sira seluk. Senti konfuzaun, viziñu ida husu, ‘Saida mak ó-nia segredu?’ ‘Simples,’ nia hatán nune’e. ‘Ha’u enxe ha’u-nia karrosa no ha’u la’o liuhusi dalan ne’ebé mak difísil liu hodi ba to’o iha sidade. Durante viajen nia laran, fehuk-ropa sira ne’ebé mak ki’ik monu ba okos liu, fehuk-ropa sira ne’ebé natoon iha parte klaran, no fehuk-ropa sira ne’ebé bo’ot sa’e ba iha leten.’ Buat ne’ebé hanesan mós akontese mai ita ema. Iha dalan sira ne’ebé mak onduladu iha moris ne’e nia laran, fehuk-ropa sira ne’ebé bo’ot sa’e ba iha leten
Jon Gordon hateten, ‘Independentemente husi difikuldade sira ne’ebé mak ó hasoru, ó-nia objetivu sira tenke bo’ot liu duké ó-nia dezafiu sira. Envezde fokus ba iha ó-nia problema sira, fokus ba iha ó-nia objetivu sira. Envezde haree ó-nia an hanesan vítima ida, haree ó-nia an hanesan manán-na’in ida ka erói ida. Erói sira no mós vítima sira monu hotu, maibé erói sira hamriik fila fali, no armadu ho fé, sira kria futuru ne’ebé mak pozitivu.’ ~SML
Hahán ba klamar: 1 Samuel 4-7 ; Lukas 23:13-25 ; Salmu 52 ; Provérbiu 21:17