‘Funu iha funu di’ak fé nian, ka’er pose ba iha moris rohan la’ek nian, ba iha ne’ebé ó mós simu bolu hodi ba iha ne’ebá.’ ~ 1 Timoteu 6:12 NKJV

Hirak ne’e mak estratejia Bíblika 6 ne’ebé mak provadu (ka terbukti) hodi manán hasoru inimigu bainhira inimigu mai hodi ataka ó.

  • Hanoin ho barani. ‘Funu iha funu di’ak fé nian… ba iha ne’ebé ó mós simu bolu hodi ba iha ne’ebá.’ Halo planu no kalkuka hanesan jenerál funu nian ida ne’ebé mak prepara ba iha batalla; estuda oinsá atu bele enfrenta no halakon ó-nia inimigu, diabu.
  • Halo orasaun ho barani. Ita simu dehan hodi hakbesik-an ba iha Na’i Maromak nia tronu ho ‘barani’ (haree iha Ebreu 4:16). Labele mo’e ba Na’i Maromak. Nia mak ó-nia ‘Abba’, ne’ebé signifika katak ‘Aman’. No ó mak Ninia oan ne’ebé mak redimidu (ka ditebus), nune’e hakbesik-an ba Nia ho fiar-an no husu ba Nia buat ne’ebé mak ó presiza.
  • Ko’alia ho barani. Apóstolu Pedru hakerek, ‘Ko’alia ba hanesan Na’i Maromak rasik mak ko’alia liuhusi ó.’ (1 Pedru 4:11 NLT) Iha liafuan seluk, uza ton komandamentu no autoritáriu nian, bainhira ó hasoru forsa sira husi diabu nian. ‘Sai forte ba iha Na’i Maromak.’ (Éfezu 6:10 KJV)
  • Fó ba ho laran-luak. Iha nível ida ne’ebé mak ó fó ba, iha nível ida ne’e mós mak ó simu. ‘Fó ho gratuita no sai riku liu tan; sai karak-ten no ó sei lakon buat hotu. Ema laran-luak sira sei prósperu; ema sira ne’ebé mak refreska ema sira seluk, sira rasik mós sei revigoradu.’ (Provérbiu 11:24-25 NLT) Laiha oferta ida ne’ebé mak ki’ik liu, no laiha oferta ida ne’ebé mak bo’ot liu.
  • Servisu ho intensu. Bíblia hateten katak iha buat saida de’it ne’ebé mak ó tula ó-nia liman ba, hala’o ida ne’e ho ó-nia fuan tomak (haree iha Ekleziástiku 9:10). Labele hakbesik-an ba iha ó-nia servisu sira ho ta’uk no ho hakarak atu halai lakon husi servisu hirak ne’e. Foti sa’e ó-nia an iha Espíritu Santu no halo remata servisu ne’e (haree iha 2 Timoteu 1:6).
  • Hadomi inkondisionalmente . Nu’udar Kristu nia segidór, ó tenke esforsu-an hodi hadomi ema sira seluk hanesan ho Kristu hadomi sira – hadomi inkondisionalmente no sakrifisialmente. ~ SML

Hahán ba klamar: Génesis 24:1-51 ; 2 Korintu 6:14-7:1