‘La’o ba iha fé nia ain fatin, iha ne’ebé ita-nia aman Abraun la’o ba.’ ~ Roma 4:12 NKJV

Bíblia ko’alia kona-ba ema sira ne’ebé mak ‘la’o mós iha fé nia ain fatin, iha ne’ebé ita-nia aman Abraun la’o ba.’ Oinsá mak ó bele la’o iha fé nia ain fatin?

  • Abraun fiar ba iha ‘Na’i Maromak, ne’ebé mak fó moris ba ema mate sira no bolu ba buat sira ne’ebé mak la eziste hanesan sira eziste.’ (Roma 4:17 NKJV) Bainhira Na’i Maromak halo promesa ida ho ó, Nia iha podér hodi bele kumpri promesa ida ne’e, maske evidénsia sira hotu no mós situasaun sira hotu iha sorin-sorin kontráriu ho saida mak Nia hateten.
  • ‘Nia ne’ebé mak, kontráriu ho esperansa, iha esperansa nia laran nia fiar… [no] nia sai aman ba nasaun barak.’ (Roma 4:18 NKJV) Bainhira razaun hotu-hotu hodi bele iha esperansa nafatin lakon tiha ona, Abraun iha esperansa nafatin. Tamba saida? Tamba Abraun nia esperansa mak iha Na’i Maromak! Karik ohin loron ó sente dezesperadu ka lakon ó-nia esperansa, hanoin ba liafuan hirak ne’e: ‘Fila fali ba iha fortaleza, imi prizoneiru sira esperansa nian. Ohin loron duni Ha’u deklara katak Ha’u sei restaura dobru ba imi.’ (Zakarias 9:12 NKJV)
  • ‘Nia ne’ebé mak… fiar… tuir buat ne’ebé mak ko’alia sai tiha ona, “Nune’e mós ó-nia dexendente sira.”’ (Roma 4:18 NKJV) Atensaun ba iha liafuan ida ne’e ‘tuir buat ne’ebé mak ko’alia sai tiha ona.’ Bainhira Na’i Maromak halo promesa ida, promesa ida ne’e iha podér autorrealizável hodi bele kumpri nia-an rasik ka hodi bele sai realidade. ‘Nune’e mós Ha’u-nia liafuan ne’ebé mak sai husi Ha’u-nia ibun; nia sei la fila fali mai Ha’u ho mamuk, maibé nia sei halo saida mak Ha’u hakarak, no… susesu iha buat ne’ebé mak Ha’u haruka nia ba.’ (Izaias 55:11 NKJV)
  • ‘Nia la nakdoko iha Na’i Maromak nia promesa tamba la fiar, maibé nia fortalese iha fé nia laran.’ (Roma 4:20 NKJV) Liafuan ‘nakdoko’ hateten mai ita katak Abraun la nakdedar, la dúvida, la debate ho ninia an rasik, no la husik ema sira seluk nia hanoin sira fó influénsia ba nia. Maibé, nia hamriik metin no firme nafatin. Hanesan ne’e mak ó la’o iha fé! ~ SML

Hahán ba klamar: 1 Samuel 11-13 ; Lukas 23:35-43 ; Salmu 13 ; Provérbiu 21:22-27