‘Ita-nia problema sira ne’ebé kamaan no momentáneu sira alkansa mai ita glória rohan-la’ek nian ne’ebé mak iha folin bo’ot liu duké sira ne’e hotu.’ ~ 2 Korintu 4:17 NIV

Iha survei ida ne’ebé mak realiza iha Amérika, peskizadór ida ho naran George Barna relata katak ema na’in-rua husi ema na’in-tolu iha Amérika bolu ba sira-nia an rasik nu’udar ‘ema kristaun ne’ebé mak kazuál’. Ida ne’e termu ida ne’ebé mak interesante teb-tebes tamba, iha esénsia, ida ne’e hakarak dehan katak deskompromizadu… hit-and-miss… kuandu ha’u sente ha’u gosta ida ne’e.

Maibé apóstolu Paulu deskreve ema kristaun sira nia moris hanesan tuir mai ne’e: ‘Ami iha tezouru ida ne’e iha vazu sira husi rai-mean nian, atu nune’e eselénsia husi podér ne’e mai husi Na’i Maromak no la’os husi ami.’ (2 Korintu 4:7 NKJV) Atensaun ba iha liafuan ‘tezouru’. Apóstolu Paulu valoriza buat ne’ebé mak Na’i Maromak tau iha nia laran; nia proteje buat hirak ne’e, nia haksolok ho buat hirak ne’e, no nia maksimiza buat hirak ne’e hotu. Karik ida ne’e dehan katak moris nu’udar ema kristaun ne’e fásil ka livre husi problema sira? La’e, apóstolu Paulu kontinua: ‘Tamba ne’e mak ami la fuan ki’ik. Maske ami-nia isin iha parte liur mate ba beibeik… ami-nia isin iha parte laran renova husi loron ba loron. Tamba ami-nia terus kamaan sira, ne’ebé mak temporáriu de’it, hirak ne’e hotu servisu hela mai ami todan glória nian ne’ebé mak bo’ot liu no rohan-la’ek, enkuantu ami la haree ba iha buat sira ne’ebé mak bele haree ho matan, maibé ba iha buat sira ne’ebé mak labele haree ho matan. Tamba buat sira ne’ebé mak bele haree ho matan ne’e temporáriu de’it, maibé buat sira ne’ebé mak labele haree ho matan ne’e rohan-la’ek.’ (2 Korintu 4:16-18 NKJV) Atensaun ba katak ‘ita-nia… terus sira… servisu hela mai ita’. Na’i Maromak uza esperiénsia sira moris nian – esperiénsia di’ak sira no aat sira – hodi hariku, hodi halo meik, hodi halo kle’an no hodi estabiliza ita. Tuirmai ne’e mak lia-loos seluk ne’ebé mak importante: saida mak ita fiar no ko’alia sai iha situasaun difísil sira nia laran determina kualidade husi ita-nia moris espirituál nian no mós ita-nia futuru. ‘Tamba ita iha espíritu fé nian ne’ebé mak hanesan, tuir buat ne’ebé mak hakerek tiha ona, “Ha’u fiar no tamba ne’e ha’u ko’alia sai,” ami mós fiar no tamba ne’e ami mós ko’alia sai.’ (2 Korintu 4:13 NKJV)

Nune’e envezde haree ó-nia situasaun sira hanesan sira servisu hodi kontra ó, ohin loron hamriik ba ho fé no deklara ba katak: ‘Ida ne’e servisu mai ha’u!’ ~ SML

Hahán ba klamar: 1 Samuel 16-17 ; Lukas 24:1-12 ; Salmu 68:1-18 ; Provérbiu 22:1-5