‘Nia hili terus hamutuk ho Maromak nia povu’. Ebreu 11:25
Segundu: Ita tenki foti responsabilidade ba ita nia moris. ‘Moises fiar ba Nai Maromak. Nee mak bainhira nia boot ona, nia lakohi atu ema konsidera nia hanesan liurai Ejitu nia bei-oan, maski liurai nia oan feto mak hakiak nia desde kiik. Tuir nia hanoin, diak liu nia terus hamutuk ho Maromak nia povu Israel, duke iha tenpu badak nia laran nia moris goza deit buat nebee mak la loos.’ (Ebreu 11:24-25) Primeiru, Moises rejeita atu sai ema seluk. Maibe nia hili atu sai nia aan rasik. Tuir mai, nia hili atu tuir Nai Maromak nia dalan. Prinsipiu iha nee mak ita bele substitui buat nebee negativu ho buat nebee positivu. Ita laos atu para deit hodi halo buat-ruma— maibe ita halo fali buat seluk. Moris Kristaun nee laos konaba regra negativu ka regulamentu. ida nee konaba relasionamentu— ho Nai Maromak, ho ema seluk no ho ita nia aan rasik.
Atensaun, Moises foti desizaun ‘wainhira nia boot ona.’ Ida nee sinal maturidade wainhira ita hatuur kestaun responsabilidade pesoal ho diak. Wainhira Moises sei bebe, ida nee labuat ida see nia adia nia desizaun konaba see mak nia. Maibe wainhira nia sai boot, nia tenki halo desizaun, asumi responsabilidade ba nia moris rasik, no lao ba oin.
Fasil tebes atu foo sala ema seluk: ‘Hau hakarak tuir Nai Maromak nia dalan karik hau nia namoradu/a, inan/aman, laen/feen, mos tuir.’ Ou, ‘Hau lolos sai ema diak ohin loron karik hau iha inan/aman nebee diak.’ Ita labele hili sirkunstansia nebee akontese iha ita nia moris, maibe ita bele hili atu sai ema nebee aat ka ema nebee diak. Ikus liu, laiha ema ida mak bele harahun ita nia moris eseptu ita nain rasik! Diabu labele, tanba nia laiha poder nebee natoon—no Nai Maromak mos sei laharahun ita nia moris, tanba Nia hadomi ita. Entaun ita tenki hili Nai Maromak nia dalan!
Hahan Ba Klamar: Ezra 1-2, Joao 6:25-35, Salmu 98, Proverbiu 24:15-18