‘Mantein ita nia hanoin konaba buat lalehan nian’. Kolose 3:2

Biblia hatete, ‘Foo atensaun bebeik ba buat lalehan nian (buat nebee leten), laos ba buat iha mundu.’ Iha buat barak mak akontese iha mundu ida nee, nebee mak fasil tebes afeta ita nia hanoin no emosaun, no ita presija aprende oinsa rezolve ida nee. Waihira buat negativu barak mak mosu iha ita nia hanoin no koko kontrola ita nia emosaun, ita presija foti minutu balu hodi ‘mantein ita nia hanoin konaba buat lalehan nian’ ba iha ‘buat nebee iha leten.’

Ida nee dalaruma ajuda ita hodi koalia ho positivu konaba saida deit mak inkomoda ita. Ezemplu, koalia ho ita nia aan rasik hanesan buat ida nee: ‘Hau nia familia dalaruma laos buat hotu nebee mak hau hakarak, maibe hau agradese tanba hau iha familia. Hau nia uma la diak liu hanesan buat nebee hau hakarak, maibe hau nia uma sai nafatin fatin nebee diak hodi hela. Agora dadaun karik hau hasoru hela situasaun difisil, maibe Nai Jesus sempre hamutuk ho hau hodi ultrapasa situasaun ida nee.’ Diabu hatene hela butaun ida nebee mak ita tenki hanehan hodi hetan reasaun emosional. Nunee saida mak ita tenki halo?

Firme nafatin iha Nai Maromak nia liafuan: ‘ Haksolok ba ema ida nebee O disiplina, Oh Nai, no hanorin liu husi O nia lei, hodi foo deskansa husi tempu susar, too ema kee ona rai kuak hodi simu ema aat sira’ (Salmu 94:12-13) Ita nafatin iha disiplina ba ita nia aan rasik hodi hatete lae ba ita nia sentimentu no hatete sim ba Maromak nia matenek, ida nee fasil tebes atu halakon inimigu iha funu espiritual. Nunee deside kedas agora katak ita sei la aranja ita nia moris ho emosaun nebee mak ita labele konfia, no fokus ba ‘buat nebee mak iha leten!’

Hahan Ba Klamar: 1 Joao 1:1-3:10, Joao 7:14-24, Salmu 104:19-26, Proverbiu 24:28